AQSHda hukumat ishini to‘xtatish xavfi oshmoqda

AQSHda federal hukumatning vaqtincha moliyalashtirilishi masalasi bo‘yicha siyosiy tortishuvlar yanada kuchaydi. Bu haqda Zamin.uz xabar berdi.

Oq uyning Boshqaruv va byudjet boshqarmasi (OMB) federal idoralarga hukumat ishining to‘xtashi ehtimoliga tayyor turishni tavsiya qildi. Bu haqida 30 sentyabr kuni OMB direktori Rassel Vout ijtimoiy tarmoqda bayonot berdi.

Voutning so‘zlariga ko‘ra, hukumat agentliklari o‘zlarining tartibli shatdaun rejalari ustida ish boshlashi kerak. U federal idoralarni vaziyatni diqqat bilan kuzatishga va OMB tomonidan beriladigan yo‘l-yo‘riqlarga amal qilishga chaqirdi.

U shuningdek, demokratlar o‘z pozitsiyalarini qanchalik uzoq saqlab qolishini aniq aytish qiyinligini ta’kidladi. AQSH Senati hukumat ishini davom ettirish uchun zarur bo‘lgan ikki qonun loyihasidan hech birini ma’qullay olmadi.

Har bir hujjat kamida 60 ta ovozga ega bo‘lishi lozim edi. Respublika partiyasi tomonidan taklif qilingan qonun loyihasi Vakillar palatasida qabul qilingan bo‘lsa-da, Senatda yetarlicha qo‘llab-quvvatlanmadi.

Demokratlar ham o‘z loyihalarini ilgari surishdi, ammo kerakli ovozlarni to‘plashda muvaffaqiyatsiz bo‘ldilar. Mutaxassislar fikricha, kelishmovchiliklarning asosiy sababi sog‘liqni saqlash xarajatlari bo‘yicha masalalardir.

Har ikki partiya bu boradagi pozitsiyalarida qat’iy turib, hozircha kelishuvga erishish imkoni yo‘qdek ko‘rinmoqda. Ma’lumotlarga ko‘ra, hukumatning vaqtincha ishini to‘xtatishi, ya’ni shatdaun 30 sentyabrdan 1 oktabrga o‘tar kechasi, mahalliy vaqt bilan yarim tunda boshlanishi mumkin.

Bu holat federal idoralarda xizmat ko‘rsatish jarayonining to‘liq yoki qisman to‘xtashiga olib kelishi ehtimoldan xoli emas.