Ilon Maskning boyligi 500 milliard dollardan oshdi

Amerikalik taniqli tadbirkor Ilon Mask moliya sohasida yangi rekord o‘rnatdi. Bu haqda Zamin.uz xabar berdi.

Forbes jurnalining ma’lumotlariga ko‘ra, uning boyligi ilk bor 500 milliard dollardan oshdi. Sharqiy vaqt bilan 15:30 da Tesla va SpaceX kompaniyalari rahbari, Neuralink asoschisi hamda X ijtimoiy tarmog‘ining egasi Ilon Maskning umumiy boyligi 500 milliard dollarlik chegarani bosib o‘tdi.

2 oktyabr kuni Toshkent vaqti bilan soat 06:15 da esa uning boyligi 500,5 milliard dollarga yetdi. Forbes tahliliga ko‘ra, Ilon Maskning boyligi shunday yuqori darajaga yetishi uning davlatdagi lavozimini tark etib, barcha diqqatini biznes loyihalariga qaratgani bilan bog‘liq.

Hozirda u Forbes milliarderlari ro‘yxatida birinchi o‘rinda turibdi. Undan keyingi o‘rinlarda Oracle kompaniyasi rahbari Larri Ellison (351,6 milliard dollar), Meta asoschisi Mark Sukerberg (246,1 milliard dollar), Amazon asoschisi Jeff Bezos (233,2 milliard dollar) va Google asoschisi Larri Peyj (204,6 milliard dollar) joylashgan.

Shuni ta’kidlash lozimki, Ilon Mask avvalgi rekord egasi ham bo‘lgan. O‘tgan yil dekabr oyida uning boyligi 400 milliard dollardan oshib, bunday natijaga erishgan birinchi shaxs sifatida tarixga kirgan edi.

Hozirgi yangi ko‘rsatkich esa uning moliyaviy muvaffaqiyatlarining davom etayotganidan darak beradi.