Filippinda kuchli zilzila 72 odam halok bo‘ldi
Filippinning Sebu viloyatida sodir bo‘lgan kuchli zilzila natijasida halok bo‘lganlar soni 72 nafarga yetdi. Bu haqda Zamin.uz xabar berdi.
Oldinroq 69 kishi qurbon bo‘lgani haqida xabar berilgan edi. Shuningdek, 294 nafar odam turli darajadagi tan jarohatlari olgani ma’lum qilindi.
GMA Newsning ma’lumotlariga ko‘ra, tabiiy ofatlarning oldini olish va oqibatlarini kamaytirish bo‘yicha milliy kengash zilziladan 170 mingdan ortiq inson zarar ko‘rganini qayd etdi. Shu jumladan taxminan 20 ming kishi uyini tark etishga majbur bo‘ldi.
Mahalliy hokimiyat ma’lumotlariga ko‘ra, kuchli silkinishlar ayrim binolarning vayron bo‘lishiga sabab bo‘lgan. Seshanba kuni mahalliy vaqt bilan 21:59 da 6,9 magnitudali zilzila yuz berdi.
Keyinchalik kuchi 1 dan 5 gacha bo‘lgan 2300 dan ortiq yer silkinishlari qayd etildi. Filippin vulqonologiya va seysmologiya institutining ma’lumotiga ko‘ra, zilzila Bogo shahridan taxminan 20 kilometr shimoli-sharqda, yer ostida 5 kilometr chuqurlikda yuz bergan.
Sebu viloyatida favqulodda holat e’lon qilindi. Eng ko‘p qurbonlar viloyatning shimolida joylashgan, aholisi 90 mingga yaqin Bogo shahri hamda San-Remijio va Medellin munitsipalitetlarida ro‘y berdi.
Hozirda favqulodda vaziyat yuzasidan zarur chora-tadbirlar ko‘rilmoqda.
