Vetnamda “Bualoi” to‘foni 36 odamni o‘ldirdi

Vetnamda yuz bergan kuchli to‘fon va uning oqibatidagi toshqinlar mamlakat aholisini chuqur qayg‘uga soldi. Bu haqda Zamin.uz xabar berdi.

“Bualoi” nomi bilan atalgan ushbu tabiiy ofat natijasida 36 nafar kishi halok bo‘lgani ma’lum qilindi. Rasmiy manbalarga ko‘ra, to‘fon 29 sentyabr kuni mamlakatning shimoliy va markaziy sohillarini qamrab oldi.

Kuchli shamol, katta to‘lqinlar va uzluksiz yog‘ayotgan yomg‘irlar ko‘plab hududlarda vayrongarchilikka sabab bo‘ldi. Hozirga qadar 21 kishi bedarak yo‘qolgan, 147 nafar fuqaro esa turli tan jarohatlari bilan shifoxonalarga yotqizildi.

Tabiiy ofatning iqtisodiy zarari ham katta bo‘lib, hukumat taxminlariga ko‘ra, “Bualoi” to‘foni va suv toshqinlari mamlakat iqtisodiyotiga 11,5 trillion dong, ya’ni 435,8 million dollar atrofida zarar yetkazdi. Ko‘plab yo‘llar, maktab binolari va davlat idoralari vayron bo‘ldi.

Elektr ta’minotining uzilishi sabab o‘n minglab oilalar yorug‘liksiz qoldi. Ba’zi viloyatlarda suv sathi uzoq vaqt pasaymayapti, bu esa aholi hayotini yanada qiyinlashtirmoqda.

Rasmiy hisobotda 210 mingdan ziyod uyga turli darajada zarar yetgani, ayrimlari esa to‘liq suv ostida qolgani qayd etilgan. Shuningdek, 51 ming gektardan ortiq qishloq xo‘jaligi yerlari, asosan guruch dalalari, butunlay yo‘q qilindi.

Ofat sabab minglab oilalar uylaridan ko‘chirilib, vaqtinchalik boshpanalarga joylashtirildi. Hukumat va qutqaruv xizmatlari barcha imkoniyatlarni ishga solib, qidiruv-qutqaruv ishlarini davom ettirmoqda.

Shu bilan birga, xalqaro hamkorlik va yordam dasturlari ham joriy etilishi mumkinligi ta’kidlanmoqda. Mutaxassislar Vetnamda har yili yirik to‘fonlar sodir bo‘lib, ularning ko‘pchiligi odamlar hayotiga jiddiy xavf tug‘dirishini bildiradi.

“Bualoi” esa so‘nggi yillarda kuzatilgan eng katta va halokatli tabiiy ofatlardan biri hisoblanadi.