Marokash yoshlar noroziligini tinch yo‘l bilan hal qiladi
Marokash Bosh vaziri Aziz Axannush mamlakatdagi yoshlar noroziliklarini tinch yo‘l bilan hal etishga tayyorligini ma’lum qildi. Bu haqda Zamin.uz xabar berdi.
U noroziliklar kamida 11 shaharni qamrab olganini ta’kidlab, barcha muammolarni ochiq va samimiy muloqot orqali hal qilish mumkinligini aytdi. Axannush hukumat yoshlar tomonidan ilgari surilgan talablar bilan tanishligini va ular bilan muzokaralar o‘tkazishga tayyor ekanligini bildirdi.
Noroziliklarning boshlanishiga Gen Z 212 harakati sabab bo‘lib, dastlab ta’lim va sog‘liqni saqlash tizimini isloh qilish talablari asosiy masala bo‘lgan. So‘ngra namoyishchilar 2030 yilgi futbol bo‘yicha Jahon chempionatiga tayyorgarlik uchun ajratilgan katta budjet xarajatlariga qarshi chiqishdi.
Ichki ishlar vazirligi ma’lumotiga ko‘ra, tartibsizliklar vaqtida uch kishi halok bo‘lgan, 350 dan ortiq kishi jarohat olgan. Hukumat voqealarni nazoratga olish va vaziyatni barqarorlashtirish uchun barcha choralarni ko‘rmoqda.
Muloqot va tinchlik yo‘li orqali muammolar hal etilishi muhimligi qayd etilmoqda.
