Britaniya parlamentida farrosh 16 yil mehnat qoidasini buzdi
Britaniyaning parlamentida farrosh sifatida ishlagan Mulikat Ogunmode 16 yil davomida kuniga 17 soat mehnat qilgani aniqlangach, ishdan bo‘shatildi. Bu haqda Zamin.uz xabar berdi.
Ogunmode 2008 yildan 2024 yilgacha Deutsche Bankda kunduzi, Buyuk Britaniya parlamentida esa kechqurun ishlagan. U muntazam ravishda ikki ish o‘rtasidagi kamida 11 soatlik dam olish vaqtini buzib, Britaniya mehnat qonunchiligiga zid harakat qilgan.
Ogunmodening qonunbuzarligi fosh etilgach, parlament uni ishdan bo‘shatishga qaror qildi. U ish beruvchiga sud orqali murojaat qilib, ishdan noqonuniy bo‘shatilgani va ish haqidan noadolatli ushlab qolishlar yuz berganini da’vo qildi.
Biroq sud uning da’volarini rad etdi. Sudya ta’kidlashicha, Ogunmodening ish vaqtidagi tartibsizliklari nafaqat uning sog‘lig‘iga va xavfsizligiga, balki jamiyat manfaatlariga ham xavf tug‘dirgan.
Shuningdek, Ogunmode ikkinchi ish joyi haqida ish beruvchiga to‘g‘ri ma’lumot bermagani uchun ham javobgarlikka tortildi. Ushbu voqea Buyuk Britaniyada ish va dam olish vaqtlariga oid qonunlarga jiddiy e’tibor qaratish zarurligini ko‘rsatadi.
