3-oktyabr kuni Rossiya ommaviy axborot vositalari Ibragim Suleymanovning qotillik bilan bog‘liq jinoyatlarda gumon qilinib hibsga olingani haqida xabar berdi. Bu haqda Zamin.uz xabar berdi.
Suleymanov "soyadagi milliarder" nomi bilan tanilgan, chunki uning ish faoliyati va shubhali aloqalari ko‘p yillar davomida keng jamoatchilik e’tiborini tortgan. Moskvaning Basman tuman sudi uni 2-dekabrga qadar hibsda saqlash qarorini qabul qilgan.
Xabarlarga ko‘ra, Suleymanovga nisbatan ayblovlar 2000-yillarda moliyaviy sog‘lomlashtirish va bankrotlik masalalari bilan shug‘ullangan federal xizmat rahbari Georgiy Talning o‘limi bilan bog‘liq. Tal 2004-yilda otib o‘ldirilgan.
Shuningdek, Suleymanov «Vnukovskiye avialinii» aviakompaniyasining bosh direktori Gennadiy Borisovning o‘limi bilan ham aloqadorlikda gumon qilinmoqda. Borisov esa 1999-yilda pichoqlash natijasida vafot etgan.
Bu Ibragim Suleymanovning birinchi hibsga olinishi emas. U 2004-yil oktyabrda tovlamachilik va 4,5 million dollardan ortiq mablag‘ni talon-toroj qilishda ayblangan.
2007-yilda esa tovlamachilik, mablag‘larni legallashtirish, kuch ishlatish bilan tahdid qilish hamda noqonuniy qurol saqlashda aybdor deb topilib, 10 yil 8 oyga ozodlikdan mahrum etilgan. 2015-yilda u muddatidan oldin ozodlikka chiqarilgan.
Ibragim Suleymanov 1967-yilda Dog‘iston Respublikasida tug‘ilgan va 1990-yillarda transport hamda aviatsiya sohasida o‘z biznesini rivojlantirgan. U «Rosaviakonsorsium»ning asoschilaridan biri bo‘lib, aviatashuvlar sohasida katta ta’sirga ega bo‘lgan.
Ma’lumotlarga ko‘ra, 2024-yilda Suleymanov va uning o‘g‘li Rasul «Sirena-trevel» IT-kompaniyasining manfaatdorlaridan bo‘lgan. Ushbu kompaniya Rossiyadagi aviachiptalarning 80 foizini Leonardo tizimi orqali bron qilish bilan shug‘ullanadi.
Bundan tashqari, Suleymanov «Miksvel» va «Universus» MCHJlarida ham ulushlarga ega. Suleymanovning biznes va shaxsiy hayoti ko‘plab insonlarning diqqat markazida bo‘lib kelmoqda.
Shu bilan birga, uning hozirgi huquqiy va iqtisodiy muammolari ham muntazam ravishda ommaviy axborot vositalarida yoritilmoqda.
