Jahon bankining ma’lumotlariga ko‘ra, mol go‘shtining narxi so‘nggi oltmish besh yil ichida birinchi marta rekord darajaga yetdi. Bu haqda Zamin.uz xabar berdi.
Hozirda ishlab chiqaruvchilar tomonidan belgilangan narx har kilogrammi uchun 6,9 dollarni tashkil etmoqda. Mutaxassislar bu holatga bir nechta asosiy omillar sabab bo‘lganini ta’kidlashmoqda.
Jumladan, dunyo bo‘ylab inflyatsiya darajasining oshishi, qoramol yetishtirish jarayonining uzoq va murakkabligi, AQSH hamda Xitoyda go‘sht iste’molining keskin ortishi, sut mahsulotlari bozoridagi narxlarning qimmatlashishi, shuningdek iqlim o‘zgarishi sababli qurg‘oqchilik va yaylov maydonlarining kamayishi hamda ozuqaning qimmatlashi asosiy sabablardan hisoblanadi. Hisobotda aytilishicha, AQSH dunyodagi yirik mol go‘shti ishlab chiqaruvchilardan biri bo‘lsa-da, ekologik muammolar tufayli qoramol soni 1951 yildan beri eng past darajaga tushgan.
Shuningdek, Yevropa Ittifoqining ko‘plab davlatlarida ham go‘sht narxlari oshmoqda. Xitoy bozorida esa mol go‘shti bilan birga cho‘chqa va boshqa go‘sht turlarining narxi ham sezilarli darajada ko‘tarilgan.
Avstraliya, Braziliya va Argentina kabi yetakchi eksportchi mamlakatlarda ham mol go‘shti narxining o‘sishi va ishlab chiqarish xarajatlarining ortishi kuzatilmoqda. Mutaxassislar fikricha, iqlim o‘zgarishi va iqtisodiy bosimlar davom etsa, mol go‘shti narxi yaqin yillarda yanada oshishi mumkin.
Bu holat iste’molchilar uchun qimmatga tushishi ehtimoli borligini bildiradi. Shu sababli, mol go‘shti bozoridagi vaziyatni diqqat bilan kuzatish va zarur choralarni ko‘rish muhimdir.
