Xitoyda “Ming” sulolasi a’zolariga og‘ir hukm chiqarildi
Xitoyning Venchjou shahrida o‘tkazilgan sud jarayonida “Ming” sulolasi deb ataluvchi yirik jinoyat guruhi a’zolariga hukm chiqarildi. Bu haqda Zamin.uz xabar berdi.
Xitoy davlat teleradiokorporatsiyasining xabariga ko‘ra, 39 nafar shaxs turli og‘ir jinoyatlar uchun javobgarlikka tortildi. Tergov ma’lumotlariga ko‘ra, “Ming” sulolasi 2015-yildan buyon Myanmaning Laukaing shahrida firibgarlik markazlarini boshqarib kelgan.
Ular noqonuniy qimorxona faoliyati, onlayn firibgarlik, narkotik moddalar savdosi va odam savdosi bilan shug‘ullangan. Jinoyat tarmog‘ining noqonuniy daromadi 10 milliard yuandan, ya’ni taxminan 1,4 milliard AQSH dollaridan ortiq bo‘lgan.
Laukaingdagi “Crouching Tiger Villa” nomli markazlarda 10 mingdan ortiq ishchi faoliyat yuritgan, ularning ko‘pchiligi majburiy mehnat va zo‘ravonlik qurboniga aylangan. Sud hukmiga ko‘ra, 11 kishi o‘lim jazosiga, 5 kishi kechiktirilgan o‘lim jazosiga, 11 kishi umrbod qamoqqa, 12 kishi esa 5 yildan 24 yilgacha ozodlikdan mahrum etildi.
“Ming” sulolasi Myanmaning eng ta’sirli jinoyat guruhlaridan biri hisoblanadi. 2023-yilda Myanma hukumati qidiruvdagi a’zolarning bir qismini Xitoyga topshirgan.
Oila yetakchisi Ming Syuechang hibsda o‘z joniga qasd qilishga uringanligi ma’lum bo‘ldi. Xitoy hukumati jinoyat tarmoqlariga qarshi qat’iy choralar ko‘rmoqda va bu xalqaro miqyosda e’tibor qozonmoqda.
Pekin bosimi ostida Tailand ham Myanma bilan chegaradosh hududlarda noqonuniy faoliyatga qarshi kurashni kuchaytirmoqda. Shunga qaramay, BMT ma’lumotlariga ko‘ra, ba’zi jinoyat tarmoqlari Kambodja kabi boshqa davlatlarda faoliyat yuritishda davom etmoqda.
BMT bunday guruhlarni “firibgarlik fabrikalari” deb atab, Xitoyning “Ming” sulolasiga nisbatan qattiq choralarini jinoyatchilikka qarshi qat’iy siyosatning namunasi sifatida baholamoqda.
