Tunisda prezident tanqidchisi o‘lim jazosiga hukm qilindi

Tunisda 56 yoshli Saber Shushan internetda mamlakat prezidenti Qays Saidni tanqid qilgani uchun o‘lim jazosiga hukm qilindi. Bu haqda Zamin.uz xabar berdi.

Bu haqda Daily Mail nashri xabar berdi. Advokat Ussam Butaljaning so‘zlariga ko‘ra, Nabel shahridagi sudya mijozini ijtimoiy tarmoqlardagi postlari sababli qatag‘on qilib, o‘lim jazosini tayinlagan.

Advokat bu qarorni hayratlanarli va misli ko‘rilmagan deb atab, hukm ustidan shikoyat berilganini ma’lum qildi. Himoyachining ma’lumotlariga ko‘ra, Saber Shushan siyosiy faol emas, oddiy ishchi hisoblanadi va hibsga olinishidan oldin prezident siyosatidan norozi bo‘lgan.

Uning ukasi esa «Biz allaqachon qashshoqlikda yashayapmiz, endi esa unga adolatsizlik ham qo‘shildi. Bu qarorga ishonolmaymiz» degan fikrni bildirdi.

Tunisda o‘lim jazosi kam qo‘llaniladi va so‘nggi 30 yil ichida ijro etilmagan. Shunga qaramay, bu hukm ijtimoiy tarmoqlarda keng norozilik va bahs-munozaralarga sabab bo‘ldi.

Ko‘plab fuqarolar va huquq himoyachilari bu qarorni siyosiy tanqidchilarni qo‘rqitishga qaratilgan harakat sifatida baholamoqda. Shuningdek, shu yil may oyida Salvadorda prezident Nayib Bukeleni tanqid qilgan mashhur advokat Rut Eleonora Lopes ham hibsga olingan edi.

Bu voqealar dunyo bo‘yicha ijtimoiy tarmoqlarda davlat rahbarlarini tanqid qilish va so‘z erkinligi masalasini yana-da dolzarb qilmoqda.