Tbilisida prezident qarorgohida to‘qnashuv yuz berdi
Tbilisida bir guruh norozilar Gruziya prezidenti Mixail Kavelashvilining qarorgohi devorini buzib, qarorgoh hududiga kirishdi. Bu haqda Zamin.uz xabar berdi.
TV Pirveli ma’lumotiga ko‘ra, namoyishchilarning bu harakati natijasida qarorgoh atrofida keskin vaziyat yuzaga keldi. Hodisa joyida portlashga o‘xshash pirotexnika vositalari ishlatilgani haqida xabar berildi.
Qarorgohni himoya qilayotgan qo‘riqchilar bilan norozilar o‘rtasida to‘qnashuvlar uzoq vaqt davom etdi. Norozilikchilar politsiyaga tosh otish va pirotexnik vositalardan foydalangan holda vaziyatni yanada murakkablashtirdi.
Bu esa o‘t ochilishiga va jarohatlar yuzaga kelishiga xavf tug‘dirdi. Hodisa joyiga tezkor qo‘shma kuchlar yetib bordi va ko‘plab shaxslar qo‘lga olindi.
Politsiya xodimlari norozilarni tinchlantirish uchun qalampir gazi va suv purkagichlardan foydalanishga majbur bo‘ldi. Gruziya Ichki ishlar vazirligi norozilik aksiyasini noqonuniy deb topdi va qonuniy choralar ko‘rilishini bildirdi.
Hukumat to‘qnashuvlar sabablarini o‘rganish hamda jinoiy javobgarlikni aniqlash uchun tergov ishlarini boshlashini ma’lum qildi. Shuningdek, shahardagi xavfsizlikni kuchaytirish va davlat obyektlariga qo‘shimcha himoya choralarini ko‘rish ishlari olib borilmoqda.
