Tramp va Netanyahu o‘rtasida G‘azo bo‘yicha tortishuv
AQSHning Axios nashri manbasiga tayanib xabar berishicha, Prezident Donald Tramp G‘azo bo‘yicha o‘z tinchlik tashabbusi jarayonining muvaffaqiyatli kechayotganiga ishonch bildirgan holda, Isroil bosh vaziri Binyamin Netanyahuga qo‘ng‘iroq qilganida nojo‘ya so‘zlar ishlatgan. Bu haqda Zamin.uz xabar berdi.
3 oktyabr kuni HAMAS vakillari Tramp rejasiga ijobiy munosabat bildirgani haqida xabar berilgach, Oq uy rahbari buni yaxshi yangilik deb baholab, darhol Netanyahuga telefon qilgani aytilmoqda. Biroq Isroil bosh vaziri ushbu javobni bayram qilishga sabab emas deb ta’riflagan.
Manbaning ma’lumotiga ko‘ra, Netanyahuning bu munosabati Trampning jahli chiqishiga sabab bo‘lgan. U prezidentga qarata, “Nega doim shunday salbiy fikrdasan?
Bu g‘alaba, uni qabul qil”, deb keskin gapirgan. Siyosiy sharhlovchilarning fikricha, bu mojaro Trampning o‘z rejasiga qanchalik jiddiy yondashayotganini va undan katta umid kutayotganini ko‘rsatadi.
Shuningdek, Vashington va Tel-Aviv o‘rtasidagi murakkab masalalar qatorida G‘azo bo‘yicha muzokaralarning ham bosimi oshib borayotgani kuzatilmoqda. Donald Trampning G‘azo haqidagi 20 banddan iborat tinchlik rejasi 29 sentyabr kuni Vashingtonda Netanyahuga bilan uchrashuv davomida e’lon qilingan edi.
Ushbu hujjatda barcha isroillik garovdagilarni ozod qilish, HAMASning taslim bo‘lishi, G‘azoga insonparvarlik yordamini yetkazish va uni vaqtinchalik xalqaro nazorat ostidagi ma’muriyatga topshirish kabi qadamlar ko‘zda tutilgan. Tomonlar bu masalada hali ham farqli yondashuvlarga ega bo‘lsa-da, amerikalik rasmiylar reja bo‘yicha ishlar davom etayotganini ta’kidlamoqda.
Isroil tomoni esa xavfsizlik nuqtai nazaridan ehtiyotkor pozitsiyani saqlab turibdi.
