Everestda qor bo‘roni sabab sayyohlar qamaldi
Tibetdagi Everest tog‘ining sharqiy qismida kuchli qor bo‘roni sababli taxminan mingga yaqin sayyoh lagerlarda qamalib qolgan. Bu haqda Zamin.uz xabar berdi.
Xitoy rasmiy ma’lumotlariga ko‘ra, qutqaruv ishlari boshlandi va ayrim sayyohlar xavfsiz joyga evakuatsiya qilindi. Qor yog‘ishi juma oqshomidan boshlab kuchaygan, natijada ba’zi chodirlar qor ostida qolib qulagan.
Sayyohlarning bir qismi sovuq ta’siridan aziyat chekmoqda. Shu sababli Everest manzarali hududga kirish vaqtincha to‘xtatildi.
Hududda ob-havo sharoiti og‘ir bo‘lib, Nepalda kuchli yomg‘irlar toshqin va ko‘chkilarga olib kelib, kamida 47 kishi halok bo‘ldi. Xitoyda esa “Matmo” to‘foni tufayli 150 mingdan ortiq odam ko‘chirildi.
Everest tog‘i 8 849 metr balandlikda joylashgan bo‘lib, dunyodagi eng baland cho‘qqi hisoblanadi. Har yili minglab sayyohlar bu tog‘ga ko‘tarilish uchun harakat qiladi, ammo so‘nggi yillarda hududda xavfli holatlar ko‘payganligi sababli ehtiyot choralarini kuchaytirish zarurati yuzaga kelmoqda.
