Jahonning turli burchaklarida Falastin xalqini himoya qilish maqsadida keng ko‘lamli namoyishlar o‘tkazilmoqda. Bu haqda Zamin.uz xabar berdi.
G‘azodagi urush va Isroilning harbiy amaliyotlariga qarshi chiqishlar Yevropa, Osiyo, Amerika va Afrika davlatlarida ommaviy tarzda davom etmoqda. Ispaniyaning Barselona shahrida 300 mingdan ortiq kishi Falastin xalqini qo‘llab-quvvatlash uchun ko‘chalarga chiqdi.
Bu namoyish shaharning tarixidagi eng yirik siyosiy harakatlardan biri sifatida qayd etildi. Ishtirokchilar “Otashkesim!”, “Falastinga erkinlik!”, “Isroilga embargo!” kabi shiorlar bilan o‘z talablarini bildirdi.
Shuningdek, Italiya poytaxti Rimda ham 250 mingdan ziyod odam tinch marshda qatnashdi. Namoyishchilar hukumatdan Isroil bilan harbiy va savdo aloqalarini to‘xtatishni so‘radi.
Rimdagi aksiyada inson huquqlari tashkilotlari, talabalar ittifoqlari va diniy vakillar birlashdi. Osiyoda ham Falastin bilan hamdardlik namoyishlari kuchaymoqda.
Janubiy Koreya poytaxti Seulda minglab fuqaro Isroilning G‘azodagi harbiy amaliyotlariga qarshi chiqdi, insonparvarlik yordamini oshirish va urushni to‘xtatishni talab qildi. Kanadada, ayniqsa Ottava va Toronto shaharlarida minglab odamlar yig‘ilib, G‘azodagi voqealarni insoniyatga qarshi jinoyat deb atadi.
Namoyishchilar xalqaro tashkilotlarning passivligini tanqid qilib, adolatli pozitsiya egallashga chaqirdi. Marokashda o‘tgan namoyishlarda esa o‘n minglab fuqarolar “Sumud” nomli global tashabbusni qo‘llab-quvvatladi.
Ular Falastin aholisi uchun gumanitar koridor ochishni va adolat talab qilishdi. Turkiyada ham faollik yuqori bo‘lib, Istanbulda Ayya-Sofiyadan Eminyonyu maydonigacha bo‘lgan yirik yurishda minglab odamlar qatnashdi.
Ular qo‘llarida Falastin bayroqlari va “G‘azoga erkinlik!” shiorlari bilan urushni qoralab, musulmon dunyosi birlashishi zarurligini ta’kidladi. Birlashgan Millatlar Tashkilotida ham Falastin masalasi yana kun tartibiga chiqdi.
Bir qator davlatlar G‘azodagi vaziyatni qattiq qoralab, favqulodda otashkesim e’lon qilishni talab qildi. Yevropa Ittifoqi ichida yagona pozitsiya shakllanmagan bo‘lsa-da, Germaniya va Irlandiya kabi davlatlar Isroilga harbiy yordamni cheklash haqida gapirmoqda.
Amerika Qo‘shma Shtatlari esa an’anaviy ravishda Isroil tomonida turib, jahon jamoatchiligining tanqidiga uchramoqda. Bu pozitsiya nafaqat arab mamlakatlarida, balki G‘arbda ham norozilik uyg‘otmoqda.
Turkiya, Janubiy Afrika va Lotin Amerikasidagi bir qator davlatlar esa Falastinni ochiq ravishda himoya qilib, G‘azodagi harbiy harakatlarni inson huquqlariga zid deb baholamoqda va Isroilga bosimni kuchaytirishni talab qilmoqda. Dunyoda Falastin uchun tinchlik va adolat talab qilgan millionlab odamlar ko‘chalarga chiqmoqda.
Ular urushning inson hayotiga faqat azob va quvvatsizlikdan boshqa narsa bermasligini yana bir bor eslatmoqda. Shu bois, xalqaro hamjamiyat tinchlik o‘rnatilishiga ko‘proq e’tibor qaratishi muhimdir.
