Bukkarayasamudramda 18 oylik qizcha kuyib vafot etdi
Hindistonning Andxra-Pradesh shtatidagi Bukkarayasamudram qishlog‘ida yurakni larzaga soluvchi hodisa yuz berdi. Bu haqda Zamin.uz xabar berdi.
Ma’lum bo‘lishicha, 18 oylik qizaloq maktab oshxonasida tasodifan qaynayotgan sut idishiga tushib ketib, og‘ir kuyish natijasida vafot etgan. Hodisa kuni maktab qo‘riqchisi o‘zining kichik qizi Akshitani ish joyiga olib kelgan edi.
Bola mushukni quvib oshxona tomon yugurgan paytda katta sut qozoniga tushib qolgan. Voqea joyida qizchaning onasi ham bo‘lgan.
U darhol bolasini qozondan olib chiqqan, ammo tanasining katta qismi kuyganligi sababli qizaloq shoshilinch ravishda shifoxonaga yetkazilgan. Shifokorlar uch kun davomida bolani saqlab qolish uchun kurash olib borishgan, ammo og‘ir kuyish oqibatida chaqaloq hayotdan ko‘z yumdi.
Mahalliy politsiya hodisa yuzasidan tergov ishlarini boshladi. Hukumat va ta’lim muassasalari vakillari ham xizmat tekshiruvini o‘tkazmoqda.
Tergov ma’lumotlariga ko‘ra, maktab oshxonasida sut qaynatish jarayonida xavfsizlik choralariga yetarlicha e’tibor qaratilmagan. Bu voqea ta’lim muassasasida xavfsizlik qoidalarini yanada kuchaytirish zaruratini ko‘rsatmoqda.
