Rossiya musulmonlari kurerlarga yangi fatvo berdi
Rossiya Federatsiyasi musulmonlari diniy boshqarmasi Ulamolar kengashi musulmon kurerlar uchun yangi fatvo qabul qildi. Bu haqda Zamin.uz xabar berdi.
Ushbu fatvoga ko‘ra, Islom dini qoidalariga zid bo‘lgan mahsulotlarni tashish va yetkazish qat’iyan taqiqlanadi. Jumladan, spirtli ichimliklar, cho‘chqa go‘shti, shariatga muvofiq so‘yilmagan hayvon go‘shti, qimor o‘yinlari bilan bog‘liq buyumlar va boshqa harom mahsulotlarni yetkazib berish mumkin emas.
Fatvoda shuningdek, agar kurer yuk ichida nima borligini bilmagan holda mahsulotlarni yetkazsa yoki harom mahsulotlarni yo‘q qilish maqsadida tashilayotgan bo‘lsa, bu holat gunoh hisoblanmaydi. Yetkazib berishga ruxsat etilgan mahsulotlar ro‘yxatida halol usulda so‘yilgan hayvon go‘shti, don mahsulotlari, sut va sut mahsulotlari, mevalar, sabzavotlar, kiyim-kechak, maishiy texnika, qurilish materiallari, mebel, kitoblar, dori-darmonlar hamda tibbiy asboblar mavjud.
Agar buyurtmada halol va harom mahsulotlar aralash bo‘lsa, kurerga daromadning ma’lum qismini sadaqa sifatida xayriya qilish tavsiya etiladi. Boshqarma bayonotida aytilishicha, kurer buyurtma tarkibini aniq bilmasa, uning faoliyati shariatga zid hisoblanmaydi, ammo taqiqlangan mahsulotni bilib yetkazsa, bu Islom qoidalariga xilof bo‘ladi.
Ushbu fatvo musulmonlarning mehnat faoliyatida halollik va diniy qoidalarga rioya qilishni ta’minlash maqsadida qabul qilingan.
