Saudiyada barcha viza egalari Umra qilishi mumkin
Saudiya Arabistoni hukumati Umra ziyoratiga oid muhim yangilikni ma’lum qildi. Bu haqda Zamin.uz xabar berdi.
Endilikda mamlakatga kirish uchun berilgan barcha turdagi vizalar egalari muqaddas Makka va Madina shaharlarida Umra ibodatini ado etish huquqiga ega bo‘ladi. Bu haqda Saudiya axborot agentligi “Haj va Umra” vazirligi ma’lumotlariga tayangan holda xabar berdi.
Yangi qarorga ko‘ra, turistik, xizmat, mehnat, oilaviy, shaxsiy hamda tranzit (stopover) vizalari bilan kirgan fuqarolar ham Umra amallarini bajarish imkoniga ega bo‘ladi. Shu tariqa, ular Saudiyaga kirish paytidanoq ziyoratni amalga oshirishlari mumkin bo‘ladi.
Bu islohotlar Saudiya hukumati tomonidan so‘nggi yillarda ziyoratchilar uchun yaratilayotgan qulayliklar tizimining davomidir. Mamlakat “Nusuk Umrah” nomli zamonaviy raqamli platformani ishga tushirdi.
Ushbu platforma orqali ziyoratchilar mehmonxona, transport va boshqa ziyorat xizmatlarini onlayn tarzda buyurtma qilish imkoniga ega bo‘ladi. Hukumat vakillari ta’kidlaganidek, mazkur tashabbus nafaqat diniy ziyoratlarni yengillashtirish, balki mamlakatga tashrif buyuruvchi sayyohlar sonini oshirishga ham qaratilgan.
Bu esa Saudiya Arabistonining “Vision 2030” dasturida belgilangan turizm va diniy sohalarni rivojlantirish yo‘nalishlaridan biridir. Shuningdek, yangi tartibga ko‘ra, Umra amallarini bajarishni istagan har bir ziyoratchi “Nusuk” platformasi yoki rasmiy turoperator orqali oldindan ro‘yxatdan o‘tishi shart hisoblanadi.
Bu tartib ziyoratchilarning tartibli va xavfsiz ziyoratini ta’minlashga qaratilgan.
