Arxangelskda o‘zbekistonlik quruvchi halok bo‘ldi
Rossiyaning Arxangelsk shahrida qurilishda ishlayotgan 22 yoshli o‘zbekistonlik yigit baxtsiz hodisa oqibatida halok bo‘ldi. Bu haqda Zamin.uz xabar berdi.
Bu haqda O‘zbekiston Respublikasining Sankt-Peterburg shahridagi Bosh konsulxonasi ma’lum qildi. Ma’lumotlarga ko‘ra, hodisa 2025 yilning 1-oktyabr kuni sodir bo‘lgan.
Surxondaryo viloyatida tug‘ilgan, 2003 yilda tavallud topgan N.S. “Koritsa” turarjoy majmuasida amalga oshirilayotgan qurilish ishlarida binoning beshinchi qavatidan tushib ketgan.
Natijada u og‘ir jarohatlar olib, voqea joyida vafot etgan. Bosh konsulxona Rossiya Tashqi ishlar vazirligining Arxangelsk viloyatidagi vakolatxonasiga rasmiy nota yuborganini bildirdi.
Hodisa yuzasidan hozirda tegishli organlar tomonidan huquqiy choralar ko‘rilmoqda. Arxangelsk shahri Solombal okrugi tergov bo‘limi jinoyat ishini Rossiya Federatsiyasi Jinoyat kodeksining 216-moddasi 2-qismi asosida — qurilish va boshqa ish jarayonlarida xavfsizlik qoidalarini buzish bilan bog‘liq holda qo‘zg‘atgan.
Tergov ishlari faol davom etmoqda. Sankt-Peterburgdagi Bosh konsulxona mazkur holatni nazoratga olganini va marhumning yaqinlariga zarur konsullik yordam ko‘rsatilayotganini ma’lum qildi.
Avvalroq ham shunga o‘xshash hodisa qayd etilgan edi. 23 yoshli o‘zbekistonlik fuqarosi Sankt-Peterburgda Rossiya Federatsiyasi Oliy sudi va sud departamenti qurilish maydonida baxtsiz hodisa sababli vafot etgani haqida xabar berilgan.
Bunday voqealar mehnat muhojirlarining xavfsizligi masalasining qanchalik dolzarb ekanligini yana bir bor ko‘rsatmoqda. Chet elda mehnat qilayotgan ishchilarning hayoti va sog‘ligini himoya qilish, shuningdek, ish beruvchilar va mas’ul tashkilotlarning xavfsizlik qoidalariga qat’iy rioya etishini ta’minlash muhim vazifa hisoblanadi.
