AQSHning Kolorado universiteti olimlari Alyaskadagi abadiy muzliklarda 40 ming yil davomida muzlab yotgan qadimgi mikroorganizmlarni uyg‘otishga muvaffaq bo‘ldi. Bu haqda Zamin.uz xabar berdi.
Tadqiqot natijalari Wionews tomonidan e’lon qilindi. Olimlar muzlagan tuproq va muz namunalarini isitish orqali ilgari o‘lik deb hisoblangan mikroblarning tirilish belgilarini aniqlashdi.
Tadqiqot rahbari doktor Tristan Karo ta’kidlashicha, ushbu namunalar mutlaqo o‘lik emas. Namuna Alyaskaning Ferbenks shahri yaqinidagi “muzlik qabristoni” deb ataluvchi tunneldan olingan.
Bir necha oy davomida +3 dan +12 darajagacha bo‘lgan haroratda saqlanganda, mikroorganizmlar yo‘qotish qiyin bo‘lgan shilimshiq qatlam — bioplyonka hosil qilgan. Olimlarning fikricha, bu mikroorganizmlar odamlar uchun xavfli emas, ammo ular iqlim o‘zgarishini kuchaytiruvchi metan va karbonat angidrid moddalari chiqarishi mumkin.
Infeksiya sohasidagi mutaxassis Brigitta Evengord muzliklarda xavfli viruslar, jumladan kuydirgi va chechak viruslari ham bo‘lishi ehtimolini bildirgan. U abadiy muzliklarni “Pandora qutisi”ga o‘xshatgan.
Olimlar global isish natijasida muzliklarning erishi qadimgi viruslarning qayta faollashishi xavfini oshirayotganini ta’kidlashmoqda. Bu esa kelajakda inson salomatligi va atrof-muhit uchun yangi tahdidlar yuzaga kelishiga sabab bo‘lishi mumkin.
Shuning uchun muzliklardagi virus va mikroorganizmlarni o‘rganish va nazorat qilish dolzarb masala hisoblanadi.
