Xitoyda cho‘chqa jigarini insonga ko‘chirildi
Xitoy tibbiyotida yangi va tarixiy qadam tashlandi. Bu haqda Zamin.uz xabar berdi.
Shensi provinsiyasidagi Xijing kasalxonasi shifokorlari ilk bor genetik jihatdan o‘zgartirilgan cho‘chqa jigarini inson organizmiga muvaffaqiyatli ko‘chirib o‘tkazdi. Bu haqda China Daily va Global Times nashrlari ma’lumot berdi.
Operatsiya klinik jihatdan o‘lik deb topilgan bemorda amalga oshirildi. Tibbiy jamoa bemorning o‘z jigarini olib tashlab, uning o‘rniga genetik modifikatsiya qilingan cho‘chqa jigarini joylashtirdi.
Olimlarning ta’kidlashicha, ko‘chirib o‘tkazilgan organ inson qoni bilan to‘liq ta’minlandi, safro ishlab chiqarishni boshladi va o‘zining fiziologik funksiyalarini muvaffaqiyatli bajardi. Eng muhim jihati shundaki, bemorning immun tizimi cho‘chqa jigarini rad etmadi, ya’ni hiperakut reaksiya yuz bermadi.
Bu holat tibbiyot tarixida kamdan kam uchraydi. Operatsiya davomida hayotiy ko‘rsatkichlar — qon aylanishi, jigarning faoliyati va moddalar almashinuvi — barqaror bo‘ldi.
Jarayondan keyingi o‘n kun davomida bemor maxsus tibbiy nazorat ostida saqlandi va barcha natijalar tibbiy komissiya tomonidan hujjatlashtirildi. Ekspertlar fikricha, bu amaliyot xenotransplantatsiya sohasidagi katta yutuq bo‘lib, kelajakda inson organlariga bo‘lgan ehtiyojni kamaytirishi mumkin.
Shu bilan birga, jigar yetishmovchiligi bilan og‘rigan ko‘plab bemorlar hayotini saqlab qolishda yangi imkoniyatlar ochiladi. Xitoy olimlarining bu muvaffaqiyati nafaqat milliy ilmiy salohiyatni, balki tibbiyot sohasidagi yangi bosqichni ham ko‘rsatdi.
Mutaxassislar fikricha, kelajakda boshqa ichki organlar, masalan, buyrak, yurak yoki o‘pka kabi a’zolarni ham hayvonlardan insonga ko‘chirish imkoniyati paydo bo‘lishi mumkin. Shu tariqa, Xijing kasalxonasida amalga oshirilgan operatsiya tibbiyot tarixida yangi sahifa ochib, inson hayotini saqlab qolish yo‘lida ilmiy izlanishlarga katta umid bag‘ishladi.
