Italiyada jamoat joylarida burqa taqiqlandi loyihasi
Italiyada bosh vazir Jorjiya Meloni yetakchiligidagi “Italiya birodarlari” partiyasi jamoat joylarida burqa, niqob va paranji kiyishni taqiqlash hamda masjidlarni moliyalashtirish ustidan nazoratni kuchaytirishni maqsad qilgan qonun loyihasini parlamentga taqdim etdi. Bu haqda Zamin.uz xabar berdi.
Ushbu hujjat partiyaning rasmiy sayti orqali e’lon qilindi. Qonun loyihasi Deputatlar palatasiga “Kamsitishga qarshi” nomi bilan kiritilgan.
Unda davlat muassasalari, maktablar va universitetlar kabi jamoat joylarida burqa, niqob va paranji kiyishni taqiqlash taklif etilgan. Shuningdek, masjidlarni moliyalashtirishda shaffoflikni ta’minlash va majburiy nikoh uchun qattiqroq jazo belgilash ko‘zda tutilgan.
Loyihaga ko‘ra, taqiqni buzganlarga 300 dan 3000 yevrogacha jarima solinishi mumkin. Yanvar oyida Meloni koalitsiyasidagi “Liga” partiyasi ham shunga o‘xshash qonun taklif qilgan, ammo uning qamrovi torroq edi.
Hozirda “Liga” loyihasi parlament qo‘mitasida ko‘rib chiqilmoqda, biroq u “Italiya birodarlari” partiyasining taklifi bilan birlashtiriladimi, aniq emas. Parlamentda o‘ng partiyalar ko‘pchilik bo‘lgani sababli qonun loyihasining qabul qilinishi ehtimoli yuqori hisoblanmoqda.
Muhokama sanasi hali belgilanmagan.
