G‘azoda o‘t ochish to‘xtatilishi bo‘yicha kelishuvlar imzolandi
G‘azoda o‘t ochishni to‘xtatish bo‘yicha bir qator kelishuvlarga erishildi. Bu haqda Zamin.uz xabar berdi.
Ushbu kelishuvga ko‘ra, Isroil hukumati tasdiq bergan zahoti harbiy harakatlar darhol to‘xtatiladi. Kelishuv doirasida HAMAS taxminan 20 nafar garovdagilarni ozod qiladi.
Javoban, Isroil 1700 ga yaqin falastinlik mahbuslarni, jumladan 250 nafari umrbod qamoqqa hukm qilinganlarni ozod etadi. Bundan tashqari, Isroil mudofaa kuchlari 72 soat ichida G‘azo hududidagi kelishilgan chiziq orqasiga chekinadi.
BMT va Qizil Yarim Oy jamiyati insonparvarlik yordam yo‘laklarini tashkil etishga yordam beradi. Kelishuv ijrosini Qatar, Misr, Turkiya va AQSh muvofiqlashtiradi.
Shunga qaramay, muhim ikki masala hali ham hal qilinmagan. Ulardan biri – Isroilning aniq chekinish chizig‘i tasdiqlanmaganligi, ikkinchisi esa sulhdan keyin G‘azo hududini kim boshqarishi haqida aniq qaror yo‘qligidir.
Ushbu masalalar kelgusida muhokama qilinishi kutilmoqda.
