Vetnamda Matmo to‘foni sabab kuchli yomg‘ir va suv toshqini yuz berdi. Bu haqda Zamin.uz xabar berdi.
Natijada sakkiz kishi halok bo‘ldi, besh kishi jarohat oldi. Mahalliy tabiiy ofatlarga qarshi kurash agentligining ma’lumotlariga ko‘ra, 15 ming 700 dan ortiq uy to‘liq suv ostida qoldi, 400 dan ziyod uyga zarar yetdi.
Shuningdek, 14 ming 600 gektardan ortiq sholi va boshqa qishloq xo‘jaligi yerlari sel oqibatida jabr ko‘rdi. Suv toshqinlari natijasida 97 mingdan ortiq chorva mollari va parrandalar halok bo‘ldi.
Shimoliy va markaziy tog‘li hududlarda jami 602 ta joyda suv toshqini qayd etildi. Ko‘chkilar sababli transport harakati cheklangan va ayrim yo‘llar yopilgan.
Vetnam bosh vaziri Fam Min Trin aholini himoya qilish bo‘yicha favqulodda chora-tadbirlar joriy etdi. Hukumat tabiiy ofatning oqibatlarini kamaytirish uchun barcha zarur choralarni ko‘rmoqda.
Hududlarda yordam va tiklash ishlari davom etmoqda. Aholi xavfsizligi birinchi o‘rinda turibdi.
