Putin va Aliyev AZAL fojiasi haqida gaplashdi
Dushanbe shahrida 9-10 oktabr kunlari o‘tkazilgan «Markaziy Osiyo – Rossiya» sammiti va MDH Davlat rahbarlari kengashi yig‘ilishi doirasida Vladimir Putin va Ilhom Aliyev o‘rtasidagi uchrashuv avvalambor o‘tgan yilning 25 dekabrida Qozog‘iston hududida halokatga uchragan AZAL samolyoti fojiasi haqida suhbat bilan boshlandi. Bu haqda Zamin.uz xabar berdi.
RIA xabariga ko‘ra, ushbu masalani muhokama qilish taklifini aynan Putin bildirdi. Rossiya prezidenti oldinroq Rossiya osmonida yuz bergan fojia yuzasidan Ozarbayjon tomonidan rasmiy uzr so‘ralganini eslatib, halok bo‘lgan yo‘lovchilarning yaqinlariga chuqur hamdardlik bildirdi.
U ta’kidlashicha, Moskva tergov jarayoniga to‘liq yordam ko‘rsatmoqda va hodisa sabablarini, xususan, osmonda Ukraina droni mavjudligi bilan bog‘liq holatlarni o‘rganmoqda. Putin ma’lumot berishicha, fojia yuz bergan kuni AZAL samolyot bortida uchta ukrain uchuvchisiz qurilmalari Rossiya chegarasidan o‘tgan.
Rossiya havo hujumidan mudofaa tizimi yo‘llagan ikki raketa samolyotga to‘g‘ridan-to‘g‘ri tegmagan, portlashlar samolyotdan bir necha metr uzoqlikda sodir bo‘lgan. Samolyot esa ehtimoliy ravishda portlashdan kelib chiqqan parchalar sabab shikastlangan.
Shu bilan birga, ekipaj Maxachqal’aga qo‘nishga ruxsat olgani, ammo ular o‘z aerodromiga qaytishni afzal ko‘rganligi qayd etilgan. Davlat rahbari mas’ul shaxslarning harakatlari qonuniy bahosiz qolmasligini ta’kidlab, tovon to‘lash masalalari bo‘yicha Rossiya zarur jarayonlarni amalga oshirishini bildirdi.
Ushbu holatni to‘liq ochib berish uchun vaqt kerakligi qayd etildi. Ma’lumot o‘rnida aytish joizki, AZAL samolyotida jami 67 kishi bo‘lgan, ulardan 5 nafari ekipaj a’zolari.
Fojia natijasida 38 yo‘lovchi halok bo‘lgan, 29 nafari esa tirik qolgan. Sammit doirasidagi uchrashuvda tomonlar mazkur hodisani har tomonlama, ochiq va tizimli tergov qilish tarafdori ekanliklarini yana bir bor tasdiqladilar.
