Turkiyada jinoyat olamida «Jahannam Najoti» nomi bilan tanilgan Jo‘shqun Arabaji qo‘lga olindi. Bu haqda Zamin.uz xabar berdi.
53 yoshli jinoyatchi 7-oktyabr kuni Izmir aeroportida ushlangan. Uning nomi Interpolning xalqaro qidiruv ro‘yxatida bo‘lgan.
Ma’lumotlarga ko‘ra, Arabaji Germaniyada «Kyoln otasi» laqabi bilan ham mashhur bo‘lib, unga pul yuvish, tovlamachilik, giyohvand moddalar savdosi va qurol kontrabandasi kabi jinoyatlar qo‘yilgan. Tergovga yaqin manbalar uning bir necha davlatda tashkil etilgan jinoiy tarmoqlar bilan aloqasi borligini bildirgan.
Izmirdagi maxsus operatsiya davomida Arabaji hujjat tekshiruvi paytida aniqlanib, darhol hibsga olindi. Hibsga olishdan so‘ng uning ekstraditsiyasi masalasi qonun doirasida ko‘rib chiqiladi.
Huquqni muhofaza qiluvchi idoralar ushbu qo‘lga olish transmilliy jinoyatchilikka qarshi olib borilayotgan chora-tadbirlarning muhim bosqichi ekanini ta’kidlamoqda. Bu orqali yana bir «o‘ta qidiruvdagi» shaxs ushlanganligi ma’lum qilindi.
