Mariya Korina Machado Nobel tinchlik mukofotini oldi
Nobel qo‘mitasi 2025 yilgi tinchlik mukofotini Venesuela siyosiy arbobi Mariya Korina Machadoga topshirishini Osloda bo‘lib o‘tgan marosimda e’lon qildi. Bu haqda Zamin.uz xabar berdi.
Qo‘mita raisi Yorgen Vatne Fridnesning so‘zlariga ko‘ra, mukofot Venesuela xalqining demokratik huquqlarini himoya qilish yo‘lida ko‘rsatgan tinimsiz sa’y-harakatlari uchun berilmoqda. Ushbu yil mukofotga jami 338 nomzod taqdim etildi.
Ularning 244 nafari jismoniy shaxs, 94 nafari esa tashkilot hisoblanadi. O‘tgan yilda esa nomzodlar soni 286 tani tashkil qilgan bo‘lib, ular orasida 197 shaxs va 89 tashkilot bor edi.
Eng yuqori ko‘rsatkich esa 2016 yilda qayd etilgan bo‘lib, 376 nomzod bo‘lgan. So‘nggi yillarda tinchlik mukofoti laureatlari orasida inson huquqlari, matbuot erkinligi va yadroviy qurolsizlanish yo‘lidagi faoliyati bilan tanilgan shaxslar va tashkilotlar bor.
Masalan, 2024 yilda Xirosima va Nagasaki atom bombardimonlari jabrdiydalari kengashi mukofotlangan bo‘lsa, 2023 yilda Eronlik ayollar huquqlari faoli Nargis Muhammadiy e’tirof etilgan. 2022 yilda Rossiyaning “Memorial” tashkiloti, Ukraina Fuqarolik erkinliklari markazi va Belarusdan Ales Belyatskiy inson huquqlarini himoya qilishdagi faoliyati uchun tan olingan.
2021 yilda esa Dmitriy Muratov va Mariya Ressa matbuot erkinligi va demokratiyani himoya qilgani uchun mukofotlangan. Nobel mukofotlari fiziologiya, fizika, kimyo, adabiyot va tinchlik sohalarida ta’sis etilgan bo‘lib, ular 1901 yildan buyon Alfred Nobelning vasiyatiga binoan berib kelinmoqda.
Mariya Korina Machadoga berilgan bu mukofot Lotin Amerikasida demokratiya va fuqarolik qadriyatlari uchun olib borilayotgan kurashning global ahamiyatini yana bir bor tasdiqlaydi.
