Volgogradda Ukraina dronlari yonilg‘i infratuzilmasini urdi
Rossiyaning Volgograd viloyatida Ukraina tomonidan ko‘plab dron hujumlari amalga oshirildi. Bu haqda Zamin.uz xabar berdi.
Viloyat rahbari Andrey Bocharovning ma’lumotiga ko‘ra, Kotovskiy tumanidagi yonilg‘i va energetika infratuzilmasiga qilingan zarbalar natijasida uchuvchisiz apparatlar parchalari yong‘in sabab bo‘ldi. O‘t o‘chiruvchilar tezkorlik bilan voqea joyiga yetib kelib, yong‘inni bartaraf etmoqda.
Hujum qilingan obyektlar haqida rasmiy ma’lumot berilmagan. Mahalliy aholi Astra nashriga «Lukoyl» kompaniyasiga qarashli Korobkovskiy gazni qayta ishlash zavodida yong‘in chiqqanini bildirdi.
Ushbu zavod Janubiy federal okrugda tabiiy gazni qayta ishlash bo‘yicha muhim korxonalardan biridir. Shuningdek, yangi sun’iy yo‘ldosh tasvirlari orqali «Transneft-Privolga» aksiyadorlik jamiyatiga kiruvchi «Yefimovka» neft nasos stansiyasi yaqinida ham yong‘in izlari aniqlangan.
Rossiya Mudofaa vazirligi ma’lumotiga ko‘ra, bir kecha-kunduzda jami 19 ta ukrain droni urib tushirilgan, shulardan to‘qqiztasi aynan Volgograd osmonida yo‘q qilingan. Biroq, dronlar parchalari va zarbalarning oqibatida ayrim obyektlarda yong‘inlar kelib chiqqan.
Avgust oyidan boshlab Ukraina Qurolli kuchlari Rossiyaning energetika zanjiriga, xususan neft va gazni qayta ishlash zavodlari hamda nasos stansiyalariga muntazam hujumlar uyushtirmoqda. So‘nggi ikki oy ichida mamlakatdagi har uchinchi neftni qayta ishlash zavodi hujumga uchragan.
Sentyabr oyida Novokuybishevsk neft kimyo ishlab chiqarish zonasida, «Gazprom»ning Astraxan gazni qayta ishlash majmuasida va Moskva viloyatini yonilg‘i bilan ta’minlovchi «Rosneft»ning Ryazan neft kimyo ishlab chiqarish zonasida ishlar qisman yoki to‘liq to‘xtatilgan edi. Oktyabr oyining birinchi haftasida esa yana kamida beshta zavodga zarba berilgani xabar qilindi.
Bunday hujumlar ta’minot tizimida qisman uzilishlarga olib kelishi mumkin, bu esa ichki logistika va zaxiralarni boshqarishga qo‘shimcha bosim yaratadi. Chegaraoldi hududlarda havo mudofaa tizimining faolligi oshishi kutilmoqda.
Nasos stansiyalari va gaz-neft qayta ishlash korxonalaridagi uzilishlar yonilg‘i bozorida mahalliy o‘zgarishlarga sabab bo‘lishi mumkin. Hozircha rasmiylar zarar miqdori va tiklash muddatlari haqida qo‘shimcha ma’lumot bermagan.
Shunga qaramay, so‘nggi hujumlar Rossiyaning energetika infratuzilmasining zaif tomonlarini yana bir bor jamoatchilik e’tiboriga olib chiqdi.
