Isroil mudofaa armiyasi juma kuni tushdan keyin yangilangan joylashuv chiziqlari bo‘yicha pozitsiyalarni egallash ishlarini boshlaganini ma’lum qildi. Bu haqda Zamin.uz xabar berdi.
Bu holat Hamas va Isroil o‘rtasida otishmalarni to‘xtatish bo‘yicha kelishuv amalga oshirilgani haqida xabar beradi. Payshanba kuni Isroil hukumati AQSh prezidenti Donald Trampning vositachiligida ishlab chiqilgan yangi tinchlik rejasini tasdiqlagan edi.
Ushbu hujjatga ko‘ra, Isroil armiyasi belgilangan pozitsiyalarga joylashgach, Hamas tomoniga garovda saqlanayotgan isroilliklarni qaytarish uchun 72 soat muddat beriladi. Isroil mudofaa armiyasi bayonotida janubiy qo‘mondonlik harbiylari o‘z pozitsiyalarida turibdi va har qanday bevosita tahdidga qarshi javob choralarini ko‘rishda davom etayotgani ta’kidlangan.
Hozircha Isroil qo‘shinlari aniq qaysi hududlardan chekinayotgani haqida rasmiy ma’lumot berilmagan. Biroq AFP agentligining manbalariga ko‘ra, harbiy texnika Xon Yunus tumanlari va G‘azo shahrining shimoli-g‘arbiy chekkalaridan olib chiqilmoqda.
Bu xabardan so‘ng G‘azo bo‘ylab aholi o‘z hududlariga qaytish signali berilishi kutilmoqda. Isroil matbuoti ma’lum qilishicha, kechadan beri Al-Rashid yo‘lida kutib turgan yuzlab falastinliklar shimolga qarab harakatlana boshlagan.
Shu bilan birga, Isroil harbiylari aholidan faqat ruxsat etilgan yo‘nalishlarda harakat qilishni so‘rab, qo‘shinlar joylashgan hududlarga yaqinlashmaslikni ogohlantirmoqda. Ayni paytda Isroil armiyasi G‘azo hududining taxminan yarimidan ko‘prog‘ini, ya’ni 53 foizini nazorat qilmoqda.
Bu hudud asosan shaharlardan tashqaridagi bufer zonalar bo‘lib, Misr chegarasidagi Filadelfiya yo‘lagi, Bayt-Xanun va Bayt-Lahiya tumanlari hamda G‘azo shahrining sharqiy qismlarini o‘z ichiga oladi. Kelishuvga ko‘ra, Isroil qo‘shinlari ma’lum hududlarda qoladi va keyingi ogohlantirish berilmaguncha bu joylarga yaqinlashmaslik tavsiya qilinadi, chunki bu hayot uchun xavfli bo‘lishi mumkin.
Isroil armiyasi vakili polkovnik Avichay Adrai ham bufer zonaga yaqinlashish juda xavfli ekanini ta’kidladi. Shu bilan birga, juma kuni ertalabdan Isroil va G‘azo chegarasi ustida tutun halqalari ko‘rindi.
Xon Yunus atrofida artilleriya otishmalari kuzatilgani va Netsarim koridori hududida o‘q tovushlari eshitilgani xabar qilindi. Shunday bo‘lsa-da, ko‘pchilik bu kelishuvni mojaroning vaqtinchalik to‘xtashi va odamlarning uylariga qaytish imkoniyati sifatida qabul qilmoqda.
G‘azo aholisi hozir haqiqiy tinchlikni kutmoqda va umid bilan kelajakni kuzatmoqda.
