AQSH Meksika chegarasida aqlli devor qurmoqda
Amerika Qo‘shma Shtatlari Meksika bilan chegara bo‘ylab zamonaviy “aqlli devor” qurish loyihasini amalga oshirishni boshladi. Bu haqda Zamin.uz xabar berdi.
Ushbu loyiha doirasida 4,5 milliard dollar ajratilib, qurilish ishlari uchun o‘nta shartnoma imzolangan. Bu haqda Newsmax telekanali ma’lumot berdi.
Kelishuvlar 15–30-sentyabr kunlari “One Big Beautiful Bill” nomli qonun asosida amalga oshirilmoqda. Rejaga ko‘ra, 370 kilometr uzunlikdagi devor va 640 kilometr texnologik infratuzilma barpo etiladi.
“Smart Wall” tizimi an’anaviy to‘siqlardan farqli o‘laroq po‘lat konstruksiyalar, patrul yo‘llari, yoritish uskunalari, kameralar va sensorlar bilan jihozlanadi. Bu texnologiya chegarani noqonuniy kesib o‘tish holatlarini real vaqtda nazorat qilish imkonini beradi.
Bojxona va chegara nazorati xizmati bayonotida ta’kidlanishicha, loyiha Amerika Qo‘shma Shtatlarining chegara xavfsizligini mustahkamlash bo‘yicha maqsadlariga erishish yo‘lida muhim qadamdir. Shuningdek, Donald Tramp o‘z inauguratsiyasida AQSHga noqonuniy kirishni to‘xtatish va muhojirlar oqimini kamaytirish niyatini bildirgan hamda janubiy chegarada favqulodda holat e’lon qilgan edi.
Mutaxassislar fikricha, yangi “aqlli devor” fizik to‘siq bilan raqamli nazoratni birlashtirib, migratsiya va kontrabanda holatlarini sezilarli darajada kamaytirishga yordam beradi. Ushbu loyiha chegara xavfsizligini oshirish va noqonuniy harakatlarni oldini olishda muhim rol o‘ynaydi.
