Politico nashrining xabar berishicha, Isroilning bir oy oldin Qatar poytaxtiga qilgan zarbasi nafaqat mintaqaviy siyosiy vaziyatni keskinlashtirdi, balki Amerika Qo‘shma Shtatlarining faol diplomatik aralashuviga sabab bo‘ldi. Bu haqda Zamin.uz xabar berdi.
Natijada G‘azo sektorida otishmalar to‘xtatildi. Ma’lumotlarga ko‘ra, 9 sentyabr kuni Isroil Qatar poytaxti Dohaga havo hujumi uyushtirdi.
Ushbu hujumda Isroil harbiylari 2023 yil 7 oktabrda sodir etilgan teraktni rejalashtirgan HAMAS yetakchilarini asosiy nishon qilib ko‘rsatdi. Guruh tomonidan besh kishi, jumladan harakat muzokarachisining o‘g‘li va Qatar xavfsizlik xizmati xodimi halok bo‘lgani ma’lum qilindi.
Bu voqeadan so‘ng Qatar Isroilni qo‘rqoqona hujumda ayblab, G‘azo bo‘yicha vositachilikdan voz kechish bilan tahdid qildi. Isroil esa Qatarning terrorchilarni yashirayotganini da’vo qildi.
Shunga qaramay, keskinlik kuchaygan bir paytda Isroil bosh vaziri Binyamin Netanyaxu oy oxirida Dohadan rasmiy uzr so‘radi. Politico ta’kidlaganidek, aynan shu voqea diplomatik jarayonda burilish nuqtasi bo‘ldi.
AQSh prezidenti Donald Tramp vaziyatdan foydalanib, Isroilga kuchli bosim o‘tkazdi va tinchlik jarayonining tezlashishiga hissa qo‘ydi. Oq uy manbalarining ma’lum qilishicha, Tramp Dohaga qilingan zarbadan so‘ng Isroilni otishni to‘xtatishga majbur qildi.
Manba so‘zlariga ko‘ra, prezident qat’iyatli harakat qilib, Isroilni sulhga rozi bo‘lishdan boshqa chorasi qolmaguncha bosim o‘tkazdi. Shu bilan G‘azo sektoridagi sulh 10 oktabrdan kuchga kirdi.
Birinchi bosqichda HAMAS asirlikdagi isroilliklarni ozod qiladi, Isroil esa falastinlik mahbuslarni qo‘yib yuboradi hamda qo‘shinlarini kelishilgan chiziqlarga olib chiqadi. Tahlilchilar ushbu jarayonni “Qatar zarbasidan boshlangan diplomatik domino” deb atashmoqda.
Bu hodisa nafaqat Isroil siyosatida, balki Donald Trampning xalqaro maydondagi mavqeida ham yangi sahifa ochdi.
