Lourens Uotkins eng uzun ismga ega bo‘ldi

Yangi Zelandiyaning Oklend shahrida yashovchi Lourens Gregori Uotkins insoniyat tarixidagi eng uzun ismga ega shaxs sifatida Ginnes rekordlar kitobiga kiritildi. Bu haqda Zamin.uz xabar berdi.

Uning ismi 2253 ta so‘zdan iborat bo‘lib, bu “Eng uzun shaxsiy ism” nominatsiyasida mutlaq jahon rekordi hisoblanadi. Ma’lumotlarga ko‘ra, Lourens Uotkins 1990 yil 8 mart kuni Yangi Zelandiya fuqarolik reestriga ismini o‘zgartirish uchun ariza topshirgan.

U o‘z ismidagi so‘zlarni turli madaniyat va tarixda iz qoldirgan shaxslar — faylasuflar, siyosatchilar, yozuvchilar va olimlarning nomlari bilan boyitgan. Uotkinsning so‘zlariga ko‘ra, uning ismi inson sivilizatsiyasining qisqacha tarixi sifatida qaraladi va har bir so‘z ma’noga ega.

Dastlab davlat organlari uning ismini rasmiylashtirishni rad etgan, biroq keyinchalik Yangi Zelandiya Oliy sudi Uotkins foydasiga qaror chiqarib, fuqarolarning ismni erkin tanlash huquqini himoya qilgan. Shundan so‘ng uning ismi rasmiy hujjatlarga kiritilgan.

Hozirda u kundalik hayotda “Lourens Gregori” deb tanilsa-da, to‘liq ismi hujjatlarda saqlanmoqda. Ginnes rekordlari rasmiy saytida ham “Eng uzun shaxsiy ism” 2253 so‘zdan iboratligi va uning yagona egasi Lourens Gregori Uotkins ekani qayd etilgan.

Bu voqea butun dunyo bo‘ylab katta qiziqish uyg‘otdi. Xorijiy ommaviy axborot vositalari uni “o‘z ismini kutubxonaga aylantirgan inson” deb atadi.

Aytishlaricha, uning ismini to‘liq aytish 10 daqiqadan ortiq vaqt talab etadi. Lourens o‘zining barcha so‘zlarni yoddan bilmasligini tan olgan bo‘lsa-da, har bir so‘z uning tarixining bir qismi ekanini ta’kidlagan.

Shu tariqa, Lourens Gregori Uotkins nafaqat yangi rekord egasiga aylanishi, balki shaxsiy erkinlik va o‘ziga xoslik ramziga ham aylandi.