Pokiston Afg‘onistonning qurolli hujumlarini qoraladi

Pokiston ichki ishlar vaziri Muhsin Naqviy Afg‘oniston hududidan Pokiston tinch aholisiga qarshi amalga oshirilgan qurolli hujumlarni qat’iyan qoraladi. Bu haqda Zamin.uz xabar berdi.

Unga ko‘ra, “Tolibon” kuchlari tomonidan Pokiston hududiga o‘t ochilishi xalqaro huquq normalarining ochiqdan-ochiq buzilishi hisoblanadi. Vazirning ta’kidlashicha, bu harakatlar xalqaro qoidalar va normalarga ziddir.

Afg‘oniston o‘t bilan o‘ynashmoqda va agar vaziyat shunday davom etsa, Pokiston bu tajovuzga munosib javob qaytarishga tayyor turadi. Muhsin Naqviy shuningdek, Pokiston hech qachon provokatsiyalarga berilmasligini, ammo har qanday tahdidga qarshi qat’iy choralar ko‘rishga tayyor ekanligini bildirdi.

U Afg‘oniston rahbariyatini qo‘shnilik munosabatlarini buzmaslik va chegara xavfsizligini ta’minlashga chaqirdi. Vazir Hindiston misolini keltirib, agar Afg‘oniston bosimni davom ettirsa, munosib javob olishini qo‘shimcha qildi.

So‘nggi haftalarda Pokiston va Afg‘oniston chegarasida keskinlik oshib bormoqda. Ikki davlat o‘rtasida chegara xavfsizligi, migrantlar oqimi hamda qurolli to‘qnashuvlar bo‘yicha tortishuvlar kuchaygan.

Bu vaziyat mintaqada barqarorlik va tinchlikka salbiy ta’sir ko‘rsatishi mumkinligi haqida ogohlantirishlar berilmoqda. Pokiston hukumati chegarani mustahkamlash va xavfsizlikni ta’minlash borasida barcha zarur choralarni ko‘rishga tayyorligini bildirgan.

Shuningdek, muloqot va hamkorlik yo‘li bilan muammolarni hal qilish tarafdori ekanligi qayd etilgan.