Yaponiya suzib yuruvchi shahar loyihasini taqdim etdi
Yaponiya muhandislik va arxitektura sohasida yangi innovatsion loyiha bilan chiqdi. Bu haqda Zamin.uz xabar berdi.
Mamlakatdagi N-Ark kompaniyasi 2023-yil yozida “suzib yuruvchi kelajak shahri” nomli loyiha taqdim etdi. Bu loyiha Dogen City deb nomlanadi.
Unda nafaqat texnologik imkoniyatlar, balki inson hayotining yangi shakli va tartibi haqida yangi qarashlar mujassam etilgan. Mahalliy nashrlar bu g‘oyani hayot sifatini tubdan yaxshilaydigan muhim yangilik sifatida baholamoqda.
Dogen shahri yuqoridan qaraganda to‘rt kilometr uzunlikdagi mukammal doira shaklida quriladi. Bu shakl tabiiy ofatlar, masalan, bo‘ron yoki sunami kabi holatlarda yuqori barqarorlikni ta’minlash uchun tanlangan.
Shu bois, loyiha nafaqat insonlar uchun qulay yashash muhitini yaratadi, balki atrof-muhitga ham chidamli ekotizim sifatida xizmat qiladi. Shaharning uchta asosiy hududi mavjud bo‘ladi.
Birinchi hudud yashash halqasi bo‘lib, unda turar joylar, savdo markazlari va dam olish joylari joylashadi. Ikkinchi hudud dengiz osti markazi bo‘lib, u yerda ma’lumotlarni qayta ishlash va ilmiy tadqiqot laboratoriyalari faoliyat yuritadi.
Bu markaz dengiz suvi yordamida tabiiy yo‘l bilan sovutiladi. Uchinchi hudud sun’iy ko‘rfaz bo‘lib, bu halqasimon inshoot ichida suzuvchi orollar joylashgan va shaharning vizual hamda funksional markazini tashkil etadi.
Loyiha muhandislari Dogen shahrida 10 ming doimiy aholi va yiliga 30 minggacha mehmon yashashi mumkinligini ta’kidlamoqda. Shahar hududida maktablar, ofislar, shifoxonalar, mehmonxonalar, stadionlar, bog‘lar hamda raketalarni uchirish va qo‘ndirish uchun maxsus maydonlar bo‘ladi.
Kompaniya hisob-kitoblariga ko‘ra, shahardagi aholi yiliga taxminan 2 million litr suv, 7 ming tonna oziq-ovqat va 22 million kilovattdan ortiq elektr energiyasidan foydalanadi. Ushbu resurslarni ta’minlash muhim masala bo‘lib, muhandislar energiya manbai sifatida quyosh, shamol va dengiz to‘lqinlaridan foydalanishni rejalashtirmoqda.
Loyihaning qurilish bosqichi 2030-yilda boshlanishi kutilmoqda. Hozircha shahar qurilishi uchun aniq joy tanlanmagan, biroq Yaponiya hukumati va xususiy sarmoyadorlar ushbu loyiha ustida ishlashga qiziqish bildirmoqda.
Shu tariqa, Dogen City dunyoda yangi yashash makoni sifatida o‘z o‘rnini egallashi rejalashtirilmoqda.
