Afg‘oniston va Pokiston chegarasida og‘ir to‘qnashuvlar boshlandi
11-oktyabr kuni kechqurun Afg‘oniston va Pokiston chegarasidagi bir nechta hududlarda og‘ir to‘qnashuvlar yuz berdi. Bu haqda Zamin.uz xabar berdi.
Afg‘oniston tomoni Pokiston chegara postiga o‘q uzgani haqida xabarlar bor. Shunga javoban Pokiston artilleriya zarbalarini amalga oshirdi.
Bu haqda UPL.uz sayti ma’lum qildi. 12-oktyabr tongida janglar biroz susaygan bo‘lsa-da, Kurram tumani atrofida alohida otishmalar davom etdi.
Pokiston rasmiylari Afg‘oniston hududidagi bir nechta harbiy nuqtalarga zarba berilganini va ayrim ustuvor pozitsiyalar yo‘q qilinganini bildirdi. Afg‘oniston tomoni esa Pokistonning bir nechta blok-postlarini egallab olganini ma’lum qildi.
Kabul ma’lumotlariga ko‘ra, Pokistonning 58 harbiysi halok bo‘lgan. Islamobod esa 23 nafar harbiy xizmatchi halok bo‘lgani va 200 dan ortiq “Texrik-i-Talibon Pokiston” guruh a’zolari yo‘q qilinganini bildirgan.
Hozircha bu raqamlar mustaqil manbalar tomonidan tasdiqlanmagan. Hodisadan oldin Afg‘oniston hukumati Pokistonni havo hujumlari uyushtirishda ayblagan, ammo Islamobod bu da’voni rad etib, hujumni TTP yetakchisi Nur Vali Mexsudga qaratilganini ma’lum qilgan.
12-oktyabr kuni xavfsizlik sababli Pokiston Torkham, Chaman, Xarlachi, Angur-Adda va Gulam-Xon chegara postlarini yopdi. Natijada ikki davlat o‘rtasidagi savdo va yo‘lovchi qatnovi vaqtincha to‘xtatildi.
Hozirda tomonlar o‘zaro ayblovlarni davom ettirmoqda. Islamobod TTP Afg‘oniston hududidan harakat qilmoqda, deb hisoblaydi, Kabul esa bu ayblovlarni rad etmoqda.
Xalqaro hamjamiyat esa ikki davlatni vaziyatni tinch yo‘l bilan hal qilishga, deskalatsiya va muzokaralarga chaqirmoqda.
