Tokio va Viktoriya sayyohlar orasida yetakchi shaharlar
Dunyoning taniqli sayohat nashrlaridan biri bo‘lgan Condé Nast Traveler joriy yil uchun sayyohlar orasida eng sevimli shaharlar reytingini e’lon qildi. Bu haqda Zamin.uz xabar berdi.
So‘rovnomada 757 mingdan ortiq sayyoh ishtirok etgan. Reyting har yili tuziladi va u ikki yo‘nalishni o‘z ichiga oladi: yirik shaharlar hamda kichik sayyohlik manzillari.
Har ikki toifa go‘zallik, infratuzilma va sayyohlar uchun yaratilgan qulayliklar asosida baholanadi. Yirik shaharlar orasida Tokio birinchi o‘rinni egalladi.
Yaponiya poytaxti qadimiy me’moriy yodgorliklar, zamonaviy osmono‘par binolar, ibodatxonalar va dunyoga mashhur restoranlari bilan sayyohlarni jalb qilmoqda. Tokio ayni paytda dunyodagi eng mashhur gastronomik yo‘nalishlardan biri sifatida ham tanilgan.
Ikkinchi o‘rinda Yaponiyaning qadimiy shahri Kioto, uchinchi o‘rinda esa Janubiy Afrika Respublikasining sohil shahri Keyptaun joylashdi. Bundan tashqari, reyting kuchli o‘ntaligidan Singapur, Seul, Parij, Vankuver, Edinburg, Monreal va Kambodjaning Pnompen shaharlar ham joy oldi.
Kichik sayyohlik shaharlar ro‘yxatida Kanadaning g‘arbiy sohilida joylashgan Viktoriya shahri birinchi o‘rinni qo‘lga kiritdi. Sayyohlar odatda Vankuverga tashrifdan so‘ng bir kunni Viktoriya shahrida tabiat qo‘ynida sayr qilish, spa-mehmonxonalarda dam olish yoki Svars-Bay qo‘rfazida paromda sayohat qilishga bag‘ishlaydi.
Ikkinchi o‘rinni Tinch okeani sohilidagi Meksikaning Puerto-Valyarta shahri egalladi, uchinchi o‘rinda esa Italiyadagi san’at va tarix markazi Florensiya joylashdi. Shuningdek, Shveysariyaning Lyutsern shahri, Meksikaning San-Migel-de-Alende, Ispaniyaning San-Sebastyan va Palma-de-Malyorka, Irlandiyaning Goluey, Maltaning Valetta hamda Avstraliyaning Hobart shaharlari sayyohlar orasida sevimli manzillar sifatida reytingda yuqori o‘rinlarni egalladi.
Mutaxassislarning fikricha, joriy yilgi reyting sayyohlarning dunyo bo‘ylab an’anaviy madaniyat, tinchlik va zamonaviylik uyg‘unligini izlashini ko‘rsatadi. Tokio va Viktoriya shaharlari esa aynan shu uyg‘unlikning yorqin namunasidir.
