Oksfordshirda 220 metrli dinozavr izlari topildi
Buyuk Britaniyaning Oksfordshir viloyatida qadimiy dinozavr izlari aniqlangan. Bu haqda Zamin.uz xabar berdi.
Ushbu izlar uzunligi 220 metrga yetadigan yo‘l shaklida bo‘lib, tosh va tuproq qazib olinadigan hududda topilgan. Olimlarning ta’kidlashicha, bu izlar dunyodagi eng uzun dinozavr izlaridan biri hisoblanadi.
Izlar uzun bo‘yinli, o‘txo‘r sauropod dinozavrga tegishli bo‘lishi mumkin. Ba’zi izlar uzunligi bir metrgacha yetib, loy yuzasida qoldirilgan izlar sifatida baholanmoqda.
Tadqiqotchilar ushbu izlarni o‘rganish orqali dinozavrlarning yurish harakati va to‘xtab qolish vaqti haqida ma’lumot olishmoqda. Izlar orasidagi masofa dinozavrning bir zum to‘xtab turganini ko‘rsatadi.
Mutaxassislar bunday topilmalar dinozavrlar hayotini yanada chuqurroq o‘rganishda muhim ahamiyatga ega ekanligini ta’kidlamoqda. Bu kashfiyot tarixiy hayvonot olami haqidagi bilimlarimizni boyitishga xizmat qiladi.
