Turkiyada yashovchi 12 yoshli o‘zbekistonlik bola onasi va o‘gay otasi bilan kelishmovchilik tufayli uyidan qochib ketdi. Bu haqda Zamin.uz xabar berdi.
Istanbuldagi mahalliy politsiya va O‘zbekistonning Bosh konsulxonasi holatga aralashdi. Bola politsiyaga murojaat qilib, oilasida yuzaga kelgan qiyinchiliklar va bosim haqida ma’lumot bergan.
Onasi avval O‘zbekistonda turmush qurgan, keyin ajrashib, Turkiyaga ko‘chib kelgan va turk fuqarosi bilan imom nikoh asosida oila barpo etgan. Dastlab bola O‘zbekistonda buvisi qarovida bo‘lgan, ammo 2024 yil iyun oyida onasi uni Istanbulga olib kelgan.
Hujjatlar rasmiylashtirilmagani sabab bola mahalliy maktabga qabul qilinmagan va bir yildan ortiq vaqt davomida ta’lim ololmagan. Hodisa ma’lum bo‘lgach, politsiya bolaning xavfsizligini ta’minlab, uni Bosh konsulxonaga topshirgan.
Bolaga tibbiy ko‘rik o‘tkazilib, zarur yordam ko‘rsatildi. Konsulxona tomonidan hujjatlar rasmiylashtirilib, bola O‘zbekistonga qaytarildi.
Hozirda u vatanda tegishli muassasalar yordami bilan ta’limini davom ettirmoqda. Ushbu voqea xorijda yashayotgan yurtdoshlarimiz uchun ogohlik bo‘lib xizmat qiladi.
Mutaxassislarning ta’kidlashicha, bolalarning ruhiy va ijtimoiy holatiga e’tibor berilmasligi ularning kelajagiga salbiy ta’sir ko‘rsatishi mumkin. Ota-onalardan farzandlarining manfaatini har doim birinchi o‘ringa qo‘yishlari so‘raladi.
