Erdo‘g‘an xorijdagi turklarni Turkiyada ishlatadi
Turkiya prezidenti Rajab Toyyib Erdo‘g‘an millati turk bo‘lgan xorijliklarni Turkiyada ishlashiga ruxsat beruvchi yangi farmonni imzoladi. Bu haqda Zamin.uz xabar berdi.
Ushbu farmon 10 oktabr kuni rasmiy ravishda e’lon qilindi va xorijdagi turk diasporasi vakillari uchun yangi imkoniyatlarni yaratdi. Yangi tartibga ko‘ra, millati turk bo‘lgan, ammo boshqa davlat fuqaroligiga ega shaxslar Turkiyada murakkab byurokratik jarayonlarsiz ishlash huquqiga ega bo‘ladi.
Ular davlat va xususiy sektorda tadbirkorlik yoki kasbiy faoliyat bilan shug‘ullanishlari mumkin. Biroq harbiy xizmat va xavfsizlik idoralarida ishlash ularga taqiqlanadi.
Farmonda shuningdek, bu shaxslar kasbiy uyushmalarda ro‘yxatdan o‘tishi shartligi ta’kidlangan, ammo ulardan Turkiya fuqaroligini olish talab qilinmaydi. Yangi qonun siyosiy huquqlar, jumladan saylovlarda ishtirok etish yoki nomzod bo‘lish imkoniyatini bermaydi.
Mutasaddilar fikricha, bu qaror turk ildizlariga ega mutaxassislarni Turkiya iqtisodiyotiga jalb etish va ma’naviy hamkorlikni mustahkamlashga qaratilgan. Ekspertlar esa farmon xorijdagi turk diasporasi uchun yangi imkoniyat yaratib, Turkiya mehnat bozorida malakali kadrlar yetishmasligini qisman bartaraf etishiga xizmat qilishini ta’kidlashmoqda.
Shu tariqa, yangi tashabbus Turkiyaning global maydonda turk millatdoshlarga nisbatan ochiq siyosat yuritishini va ularni mamlakat rivojiga jalb etishga intilishini namoyon etadi.
