Italiyada 50 yil ko‘r deb nafaqa olgan erkak aniqlandi
Italiyada yuzlab odamlarni hayratga solgan voqea fosh etildi. Bu haqda Zamin.uz xabar berdi.
Vichensa shahrida yashovchi 70 yoshli erkak qariyb ellik yil davomida o‘zini ko‘r deb ko‘rsatib, davlatdan noqonuniy ravishda nafaqa olgani aniqlangan. ANSA axborot agentligi xabariga ko‘ra, u 1972 yildan beri “ko‘rlar ro‘yxati”da turib, pensiya va ijtimoiy yordamlar orqali bir million yevrodan ortiq mablag‘ olgan.
Moliyaviy gvardiya tomonidan olib borilgan tekshiruv jarayonida erkakning kundalik hayotda sog‘lom inson kabi harakat qilgani aniqlangan. U bozorlarda mahsulotlarni tanlab, naqd pul bilan to‘lov qilgan, yo‘lda mustaqil harakat qilgan va hatto bog‘da o‘tkir asboblar bilan ishlagan payti videoga olingan.
Huquq-tartibot organlari bu harakatlarning ko‘r odam uchun imkonsiz ekanligini ta’kidladi. Tergovchilar fikricha, erkak yarim asr davomida tibbiy hujjatlarni soxtalashtirish va qayta tekshiruvlardan qochish orqali davlatni aldab kelgan.
Hozirda unga moliyaviy firibgarlik bo‘yicha jinoyat ishi qo‘zg‘atilgan. Tergov jarayonida erkak qanday qilib uzoq yillar nazoratdan chetda qolganligi va kimlarning unga yordam bergani o‘rganilmoqda.
Italiya ommaviy axborot vositalari bu voqeani “asrning eng uzoq davom etgan ijtimoiy firibgarligi” deb atadi. Mutaxassislar esa bu holat ijtimoiy nafaqa tizimidagi nazorat mexanizmlarini yanada kuchaytirish zaruratini ko‘rsatganini ta’kidlashmoqda.
