Rajastanda avtobus yong‘inida 20 kishi halok bo‘ldi
Hindistonning Rajastan shtatida jiddiy yo‘l-transport hodisasi yuz berdi. Bu haqda Zamin.uz xabar berdi.
Djaysalmer–Djodxpur yo‘lida harakatlanayotgan yo‘lovchi avtobusi to‘satdan yonib ketdi. NDTV telekanalining xabariga ko‘ra, ushbu hodisa natijasida kamida 20 kishi halok bo‘ldi, yana 10 dan ortiq yo‘lovchilar jarohatlandi.
Avtobusda jami 57 yo‘lovchi bo‘lgan. Guvohlarning so‘zlariga ko‘ra, avval transport orqasidan tutun chiqqanini ko‘rishgan.
Haydovchi vaziyatni aniqlash maqsadida yo‘l chetida to‘xtagan, biroq bir necha daqiqa ichida butun avtobus olovga tutingan. Yong‘inning tez tarqalishi sababli ko‘pchilik yo‘lovchilar avtobusdan chiqishga ulgurmagan.
Qutqaruvchilar va yong‘in o‘chiruvchilar hodisa joyiga yetib kelganda, avtobus deyarli to‘liq yonib ketgan edi. Jarohatlanganlar yaqin atrofdagi shifoxonalarga olib ketildi.
Shifokorlarning ma’lum qilishicha, ba’zilari og‘ir ahvolda bo‘lib, ko‘pchilik qattiq kuyish jarohatlari olgan. Hozirda halok bo‘lganlar soni oshishi mumkinligi aytilmoqda.
Rasmiy ma’lumotlarga ko‘ra, yong‘in ehtimol qisqa tutashuv natijasida yuzaga kelgan. Politsiya va mutaxassislar hodisaning aniq sababini aniqlash uchun tergov ishlarini boshladi.
Rajastan hukumati halok bo‘lganlar oilalariga moddiy yordam ko‘rsatishni va’da qildi. Hindiston ommaviy axborot vositalari ushbu hodisani mamlakatda so‘nggi yillarda sodir bo‘lgan eng og‘ir transport falokatlaridan biri deb baholamoqda.
