Instagram ijtimoiy tarmog‘i o‘smirlar xavfsizligini ta’minlash maqsadida yangi cheklovlarni joriy qilmoqda. Bu haqda Zamin.uz xabar berdi.
Endilikda 18 yoshgacha bo‘lgan foydalanuvchilar uchun kontent PG-13 reytingiga muvofiq filtrlanadi. Bu degani, ular zo‘ravonlik, noo‘rin sahnalar yoki giyohvand moddalar bilan bog‘liq materiallarni ko‘ra olmaydi.
Kompaniya ma’lumotiga ko‘ra, ushbu sozlamalarni faqat ota-ona yoki vasiyning ruxsati bilan o‘zgartirish mumkin. Foydalanuvchi o‘zi mustaqil ravishda bu cheklovlarni bekor qila olmaydi.
Shuningdek, Instagram “Cheklangan kontent” nomli yanada qat’iy filtrni ham ishga tushirmoqda. Bu filtr o‘smirlarga muayyan turdagi postlarni ko‘rish va ularga izoh qoldirishni taqiqlaydi.
Kompaniya 2026 yildan boshlab ushbu filtrni sun’iy intellekt chatlariga ham qo‘llashni rejalashtirmoqda. Ya’ni yosh foydalanuvchi AI bilan muloqot qilganda ham yoshga mos bo‘lmagan kontentga duch kelmaydi.
Bundan tashqari, Instagram o‘smirlarni yoshiga mos bo‘lmagan kontent joylashtiradigan akkauntlardan himoya qiladi. Agar 18 yoshgacha bo‘lgan foydalanuvchi bunday akkauntga obuna bo‘lsa, u bu akkauntning postlarini ko‘rolmaydi, ular bilan muloqot qila olmaydi va ushbu sahifalar tavsiyalar ro‘yxatidan chiqariladi.
Hozircha bu yangilanishlar AQSH, Buyuk Britaniya, Avstraliya va Kanadada joriy etildi. Kompaniya kelasi yilda ushbu funksiyalarni butun dunyo bo‘ylab tatbiq etishni rejalashtirmoqda.
Bu chora-tadbirlar o‘smirlarning ijtimoiy tarmoqlarda xavfsizligini oshirishga qaratilgan.
