Eronda hijob qoidalarini buzgan kafe yopildi
Eron Islomiy qadriyatlar va jamoat axloq qoidalariga rioya qilmagan kafe va restoranlarning faoliyatini to‘xtatdi. Bu haqda Zamin.uz xabar berdi.
“Azad Iran” Telegram kanali ma’lumotlariga ko‘ra, Lorestan viloyatining Borujerd shahrida 11 ta muassasa hijob tartibini buzganligi va erkak hamda ayollar aralash holda bayram o‘tkazgani sababli yopilgan. Borujerd shahar politsiya boshlig‘i Mehdi Mahdaviyning aytishicha, tekshiruv jarayonida ushbu muassasalarda islomiy me’yorlarga zid holatlar aniqlandi.
Shu sababli ularning faoliyati jamoat tartibini mustahkamlash va ijtimoiy intizomni ta’minlash dasturi doirasida vaqtincha to‘xtatildi. Mahdaviyning ta’kidlashicha, bu choralar mamlakatda islomiy qadriyatlarni himoya qilish va jamoat joylarida axloqiy me’yorlarga qat’iy rioya qilishni ta’minlashga qaratilgan.
Har bir muassasa jamoat axloqi va diniy qoidalarni buzgan taqdirda ma’muriy javobgarlikka tortiladi. So‘nggi oylar davomida Eron hukumati hijob qoidalariga rioya qilinmaslik holatlariga qarshi nazoratni kuchaytirdi.
Natijada bir qator shaharlarda o‘nlab kafe, go‘zallik salonlari va savdo markazlari vaqtincha yopildi. Mahalliy manbalarga ko‘ra, bu qat’iy choralar ba’zi fuqarolar orasida bahs-munozaralarga sabab bo‘lmoqda.
Rasmiylar milliy qadriyatlarni himoya qilishni ta’kidlar ekan, ayrim fuqarolar bunday nazorat shaxsiy erkinliklarni cheklashini bildiradi. Eron hukumati esa o‘z pozitsiyasida qat’iy turib, diniy qoidalarni buzgan har qanday muassasa yopilishi va javobgarlikka tortilishini ma’lum qildi.
