Ukraina prezidenti Vladimir Zelenskiy Amerika Qo‘shma Shtatlariga tashrif buyurdi va safarning asosiy maqsadlarini ma’lum qildi. Bu haqda Zamin.uz xabar berdi.
Prezidentning aytishicha, tashrif davomida mudofaa va energetika sohalarida muhim muzokaralar o‘tkaziladi. Zelenskiy Vashingtonda yirik mudofaa kompaniyalari vakillari bilan uchrashuvlar rejalashtirilganini bildirdi.
Ushbu kompaniyalar Ukraina mudofaasini mustahkamlashga qodir bo‘lgan qurollar ishlab chiqaradi. Xususan, havo hujumidan himoya tizimlarini qo‘shimcha yetkazib berish masalasi muhokama qilinadi.
Shuningdek, prezident Amerika energetika kompaniyalari bilan ham muzokaralar olib borilayotganini ta’kidladi. Uning fikricha, Rossiya har kuni Ukraina energetika tizimiga zarar yetkazmoqda, shuning uchun mamlakatning barqarorligini saqlash muhim vazifa hisoblanadi.
Zelenskiy ertaga AQSH prezidenti Donald Tramp bilan uchrashishini ma’lum qildi. Uchrashuvdan Rossiya bilan urushni tugatish borasida ijobiy natija kutmoqda.
Prezidentning so‘zlariga ko‘ra, bu uchrashuv Rossiyaga qarshi urushni yakunlashga xizmat qiladi. U kuch va adolat tili Moskva bilan samarali muloqot olib borishga yordam beradi, deb hisoblaydi.
Zelenskiy Rossiyaning yangi qurollar haqida eshitgan zahotiyoq muzokaralarga tayyorlanayotganini ta’kidladi. Umuman olganda, ushbu tashrif Ukraina va AQSH o‘rtasidagi harbiy va energetika sohasidagi hamkorlikni mustahkamlashga qaratilgan.
