Vengriya hukumati Rossiya prezidenti Vladimir Putinning Budapeshtga tashrifi chog‘ida Xalqaro jinoiy sudning hibsga olish orderi asosida uni ushlamaslikni ma’lum qildi. Bu haqda Zamin.uz xabar berdi.
Bu haqda mamlakat tashqi ishlar va tashqi iqtisodiy aloqalar vaziri Peter Siyyarto bayonot berdi. Uning so‘zlariga ko‘ra, Vengriya Putinni qabul qilishga tayyor va muzokaralar uchun tinch hamda xavfsiz muhit yaratishga intiladi.
Vazir jurnalistlarga bergan intervyusida, Vladimir Putinning Budapeshtda muvaffaqiyatli muzokaralar o‘tkazib, tinch qaytishi haqida qayg‘urishini ta’kidladi. Shuningdek, Siyyarto Vengriyaning Rossiya va AQSh prezidentlari o‘rtasidagi muzokaralar uchun barcha zarur sharoitlarni yaratishga tayyor ekanini bildirdi.
U mamlakat tashqi bosimlarga bo‘ysunmasligini va Vengriyaning suveren davlat ekanligini qayd etdi. Ma’lumot uchun, AQSh prezidenti Donald Tramp 16 oktyabr kuni Rossiya prezidenti bilan Budapeshtda uchrashish niyatida ekanligini aytgan, ammo aniq sana hali belgilanmagan.
Vengriya 1999 yilda Xalqaro jinoiy sudni tashkil etuvchi Rim statutiga qo‘shilgan va ikki yil o‘tib uni ratifikatsiya qilgan. Biroq 2023 yilda mamlakat rasmiylari Putinning Budapeshtga tashrifi davomida uni hibsga olmaslik qarorini e’lon qildi.
2025 yilda esa Vengriya Isroil bosh vaziri Binyamin Netanyaxuni ham taklif qilgan, unga nisbatan ham Xalqaro jinoiy sud orderi mavjud. Shu fonada Vengriya xalqaro suddan chiqish niyatini bildirgan, ammo bu jarayon hanuz to‘liq yakunlanmagan.
Putinning so‘nggi xalqaro safarlari ham Xalqaro jinoiy sud orderiga qaramay erkin o‘tgan. U 2024 yil sentabrda Mo‘g‘ulistonga, 2025 yil oktabrda esa Tojikistonga tashrif buyurgan.
Har ikki davlat Rim statutini ratifikatsiya qilgan bo‘lsa-da, Putinning hibsga olinishi yuz bermagan. Mutaxassislar fikricha, Vengriyaning mazkur pozitsiyasi G‘arb va Rossiya o‘rtasidagi muvozanatni saqlashga qaratilgan siyosiy qadamdir.
Mamlakat Yevropa Ittifoqi a’zosi bo‘lishiga qaramay, Moskva bilan muloqotni uzishni istamaydi.
