AQSh prezidenti milliy xavfsizlik bo‘yicha sobiq maslahatchisi Jon Bolton maxfiy ma’lumotlarni noto‘g‘ri ishlatish bilan bog‘liq ayblovlarni rad etdi. Bu haqda Zamin.uz xabar berdi.
Sud jarayoni 17 oktyabr kuni Merilend shtati, Grinbelt shahrida o‘tkazildi. Bolton sudda o‘zini aybsiz deb tan oldi va jurnalistlar bilan suhbatlashishdan bosh tortdi.
Keyinchalik u shaharni tark etmaslik sharti bilan ozod qilindi. Keyingi sud majlisi 21 noyabrga belgilangan.
Tergovga ko‘ra, Bolton 2021 yil iyul oyida Eron hukumati bilan bog‘liq shaxslar uning elektron pochtasiga kirgani haqida FTBga xabar bergan, ammo maxfiy ma’lumotlarni ushbu pochta orqali yuborganini yashirgan. Federal tergovchilar uning shaxsiy elektron pochtasi va messenjerlari orqali davlat siri hisoblangan ma’lumotlarni uzatganini aniqladi.
Ushbu ma’lumotlar orasida AQShning kelajakdagi harbiy harakatlari, xorijiy davlat rahbarlari bilan uchrashuvlar va mamlakat tashqi siyosatiga oid hujjatlar bor edi. Bolton bu hujjatlarni rafiqasi va qiziga ham yuborgan.
2025 yil 22 avgust kuni FTB Boltonning uyi va ish joyini tintuv qildi. Tintuv davomida ommaviy qirg‘in qurollari, AQShning BMTdagi missiyasi hamda strategik aloqalarga oid maxfiy hujjatlar topildi.
16 oktyabrda katta hakamlar hay’ati Boltonni maxfiy ma’lumotlarni noqonuniy saqlash va uchinchi shaxslarga uzatishda rasmiy aybladi. U sakkizta va o‘nta epizod bo‘yicha ayblanmoqda.
Har bir ayblov uchun 10 yilgacha qamoq jazosi belgilanishi mumkin. Jon Bolton Donald Tramp ma’muriyatida milliy xavfsizlik bo‘yicha maslahatchi bo‘lib ishlagan va tashqi siyosatdagi qat’iy pozitsiyasi bilan tanilgan.
Uning ishi Vashingtonda katta siyosiy munozaralarga sabab bo‘ldi. Mutaxassislar fikricha, ushbu sud jarayoni AQShda maxfiy ma’lumotlar bilan bog‘liq tartib-intizomni kuchaytiradi hamda rasmiy shaxslar faoliyatiga nazoratni oshiradi.
