Germaniya tibbiyoti tarixida yangi yutuq qayd etildi. Bu haqda Zamin.uz xabar berdi.
Myunxen texnika universiteti shifokorlari bo‘yindan past falaj bo‘lgan 25 yoshli bemorning miyasi ichiga elektron uzatkich o‘rnatdi. Bu jarrohlik amaliyoti besh soat davom etdi va Yevropa miqyosida ushbu sohada amalga oshirilgan ilk muvaffaqiyatli operatsiya hisoblanadi.
Ushbu texnologiya neyroxirurgiya, sun’iy intellekt, injeneriya va biomeditsina sohalarining hamkorligi natijasidir. Shifokorlar bemorning miyasi ichiga jami 256 ta mikroelektrod o‘rnatdilar.
Bu elektrodlar har kuni inson fikri bilan bog‘liq neyron signallarini qayd qiladi. Maxsus sun’iy intellekt tizimi ushbu signallarni tahlil qilib, harakat buyruqlarini aniqlaydi.
Dastlabki bosqichda bemor fikr kuchi yordamida kompyuter kursorini boshqarishi va “bosish” amaliyotini bajarishi mumkin bo‘ladi. Keyinchalik esa u smartfon yoki robot qo‘lni nazorat qilishni o‘rganishi kutilmoqda.
Bu texnologiya inson bilan kompyuter o‘rtasidagi chegarani sezilarli darajada yaqinlashtiradi. Odam fikrini texnika tushuna boshlashi nafaqat ilm-fan, balki inson tafakkuri uchun yangi bosqichdir.
Myunxen klinikasi vakillari ta’kidicha, ularning asosiy ilmiy raqiblari AQSHda joylashgan. Amerika so‘nggi yillarda Ilon Maskning “Neuralink” kompaniyasi orqali shu yo‘nalishda ko‘plab tadqiqotlar olib bormoqda.
Yevropadagi ushbu amaliyot shunga o‘xshash texnologiyalarning yangi davrini boshlab beradi. Bu nafaqat falaj bemorlar hayot sifatini yaxshilash, balki kelajakda inson aqlini sun’iy intellekt bilan birlashtirish imkoniyatini yaratadi.
Olimlar bunday tajribalarni ehtiyotkorlik bilan olib borishni muhim deb hisoblaydi, chunki miya faoliyati bilan bog‘liq har bir eksperiment inson tabiatiga ta’sir ko‘rsatadi. Shu bilan birga, ular bu texnologiyaning kelajakda nogiron insonlarga mustaqil hayotga chiqishda yordam berishini ta’kidlamoqda.
