Germaniyada birinchi vertikal quyosh stansiyasi ishga tushdi

Germaniyaning SINN Power kompaniyasi dunyodagi birinchi vertikal suzuvchi quyosh elektr stansiyasini ishga tushirdi. Bu haqda Zamin.uz xabar berdi.

Loyiha Bavariya hududida amalga oshirilgan bo‘lib, uning quvvati 1870 kilovattni tashkil etadi. Yillik energiya ishlab chiqarish hajmi esa 2 million kilovatt soatga teng.

Ushbu ko‘rsatkich yuzlab xonadonlarni barqaror elektr energiyasi bilan ta’minlash imkonini beradi. Stansiyaning asosiy yangiligi Skipp-Float nomli tizimda namoyon bo‘ladi.

Bu tizim orqali quyosh panellari vertikal holatda o‘rnatiladi. Bunday joylashuv quyosh nurini kunning ertalab va kechki paytlarida ham samarali qabul qilish imkonini yaratadi.

Natijada elektr energiyasi ishlab chiqarish barqaror va yuqori darajada bo‘ladi. Shuningdek, ushbu texnologiya suv muhitiga zarar yetkazmaydi.

Tizim suv havzasining atigi 4,65 foizini egallaydi. Bu esa ekologik barqarorlikni ta’minlashda muhim ahamiyatga ega hisoblanadi.

Shu bilan birga, loyiha atrof-muhitni himoya qilish va energiya samaradorligini oshirishga qaratilgan innovatsion yechim sifatida e’tirof etilmoqda.