G‘azoda tinchlikdan keyin hujumlar davom etmoqda
G‘azo hukumati matbuot xizmati ma’lumotlariga ko‘ra, tinchlik kelishuvining imzolanishidan keyin Isroil tomonidan amalga oshirilgan hujumlar natijasida 38 nafar fuqaro halok bo‘lgan, yana 143 kishi jarohat olgan. Bu haqda Zamin.uz xabar berdi.
Bayonnomada qayd etilishicha, G‘azo sektorida urush tugagani e’lon qilinganidan beri Isroil tomonidan 47 ta qonunbuzarlik sodir etilgan. Bir kun oldin Isroil bosh vaziri Binyamin Netanyaxu tinchlik kelishuvi mavjudligiga qaramasdan, mamlakat G‘azodagi barcha maqsadlariga erishishda davom etishini, xususan, HAMASni to‘liq yo‘q qilish niyatidan voz kechmasligini bildirgan edi.
Shuningdek, AQSH prezidentining tashabbusi bilan HAMAS va Isroil o‘rtasida tinchlik muzokaralarini boshlash bo‘yicha dastlabki qadamlar qo‘yilgan. Shu vaqt mobaynida HAMAS asirlarni va halok bo‘lganlarning jasadlarini Isroilga topshirgan, Isroil esa qo‘shinlarini xavfsiz hududlarga olib chiqqan.
Eslatib o‘tamiz, 13 oktyabr kuni Misrning Sharm ash-Shayx shahrida o‘tgan “Tinchlik sammiti” doirasida AQSH prezidenti Donald Tramp, Misr rahbari Abdulfattoh as-Sisi, Turkiya prezidenti Rajab Toyyib Erdo‘g‘an va Qatar amiri Tamim bin Hamad Ol Soniy G‘azodagi mojaroni tinch yo‘l bilan hal qilishga qaratilgan hujjatni imzolagan. Ushbu hujjat mintaqadagi tinchlik jarayonini mustahkamlashga xizmat qilishi kutilmoqda.
