Yaqin kunlarda Eron poytaxti Tehronda “Avliyo Maryam” nomli yangi metro bekati ishga tushiriladi. Bu haqda Zamin.uz xabar berdi.
Bu haqda “RIA Novosti” axborot agentligi xabar berdi. Yangi stansiya “Maryam-e Mogaddas” nomi bilan ataladi va shahar markazidagi Nejotollahi ko‘chasida joylashgan.
U Avliyo Sarkis Arman Apostol cherkovi yaqinida qurilgan. Ushbu bekat Iso payg‘ambarning onasi, Bibiy Maryam sharafiga bag‘ishlangan.
Eron Islom Respublikasi hukumati stansiyaning nomi va ichki bezaklari orqali mamlakatdagi nasroniy ozchilikka hurmat ko‘rsatishni maqsad qilgan. Loyiha muallifi dizayner Tanya Tarigmehrning so‘zlariga ko‘ra, bekat devorlariga Bibiy Maryam hayoti va nasroniylik dinidagi muqaddas mavzularni aks ettiruvchi yetti tematik panel o‘rnatilgan.
Metro kirish joyida esa Qur’oni Karimning “Maryam” surasidan olti oyat yozilgan bo‘lib, bu islom va nasroniylik o‘rtasidagi bag‘rikenglikni ifodalaydi. Ijtimoiy tarmoqlarda foydalanuvchilar yangi stansiyaning ochilishi turli din vakillari o‘rtasidagi madaniy muloqot va o‘zaro hurmat ramzi sifatida qadrlanmoqda.
Ma’lumotlarga ko‘ra, bekatda qurilish va bezatish ishlari to‘liq yakunlangan, hozirda rasmiy ochilish marosimiga tayyorgarlik ko‘rilmoqda. Yaqin kunlarda stansiya yo‘lovchilarni qabul qilishni boshlaydi.
Bu metro bekati shaharning jamoat transporti tizimini yanada rivojlantirishga xizmat qiladi hamda diniy bag‘rikenglik va madaniy hamkorlikni mustahkamlashga yordam beradi.
