18 oktyabr kuni Amerika Qo‘shma Shtatlarida keng ko‘lamli norozilik namoyishlari bo‘lib o‘tdi. Bu haqda Zamin.uz xabar berdi.
NBC News ma’lumotlariga ko‘ra, ushbu aksiyalar mamlakat Prezidenti Donald Trampning avtoritar boshqaruv uslubi va korrupsiyaga moyil siyosatiga qarshi yo‘naltirilgan edi. Tashkilotchilarning ma’lumotiga ko‘ra, 2700 dan ortiq joyda mitinglar tashkil etilgan bo‘lib, ularda taxminan yetti milliondan ziyod odam ishtirok etdi.
Eng katta namoyishlar Vashington, Nyu-York va Chikago shaharlarida bo‘lib o‘tdi. Ishtirokchilar “Qirol yo‘q”, “Demokratiya uchun” va “Boylar davlatni egallab olmoqda” kabi shiorlarni ko‘tarib chiqishdi.
Aksariyat namoyishlar tinch tarzda o‘tdi, politsiya tomonidan hibsga olish yoki to‘qnashuv holatlari qayd etilmadi. Mitinglar Indivisible harakati tashabbusi bilan tashkil etildi.
Harakat rahbari Liya Grinberg “Biz faqat tinch yo‘l bilan fikrimizni ifodalashni xohlaymiz. AQShda hech qachon qirol bo‘lmagan va bo‘lmas ham”, deb ta’kidladi.
Mutaxassislar bu noroziliklarni Tramp ma’muriyatining siyosatiga nisbatan ortib borayotgan nafrat belgisi sifatida baholamoqda. Ayniqsa, muxoliflarga qarshi jinoiy ta’qiblar, qochqinlarga nisbatan qattiq choralar va shaharlarda tartibni saqlash uchun Milliy gvardiya qo‘shinlarining jalb qilinishi xalqning sabrini sinamoqda.
Respublika partiyasi vakillari esa ushbu namoyishlarni “Amerikaga qarshi nafrat namoyishi” deb atab, Tramp ma’muriyatini tanqid qilayotgan muxoliflarning mamlakatdagi siyosiy beqarorlikni chuqurlashtirishga xizmat qilayotganini ta’kidladi. Namoyishlar hukumatning bir qator federal idoralari faoliyati to‘xtab qolgan, minglab davlat xizmatchilari maoshsiz ta’tilga chiqarilgan vaziyatda o‘tkazildi.
Bu holat jamiyatdagi norozilik kayfiyatini yanada kuchaytirib, iyun oyidagi shunga o‘xshash chiqishlardan keyingi ikkinchi to‘lqin bo‘ldi.
